کرکٹ: نیوزی لینڈ کے خلاف ہندوستان کے لیے اتوار کو ’کرو یا مرو‘ والا مقابلہ، دو کھلاڑیوں پر رہے گی خاص نظر

پہلا میچ 7 وکٹ سے ہارنے کے بعد ہندوستانی ٹیم اتوار کو نیوزی لینڈ کے خلاف ہونے والے دوسرے یک روزہ میچ میں بلے بازی اور گیندبازی میں بہتری کرتے ہوئے برابری کے ہدف کے ساتھ اترے گی۔ یہ میچ ہندوستانی وقت کے مطابق صبح 7 بجے سے شروع ہوگا۔ قابل ذکر ہے کہ ہیملٹن شہر آکلینڈ سے ڈیڑھ گھنٹے کی دوری پر ہے۔ اس مقابلے کے میزبان مقام سیڈن پارک کی پچ بلے بازی کے لیے مددگار ہے۔ ہندوستانی ٹیم کو پتہ ہے کہ سیریز میں برابری کے لیے اس کے سلامی بلے بازوں شکھر دھون اور شبھمن گل کو تیز رفتار کے ساتھ رن بنانے ہوں گے۔

شکھر دھون اور شبھمن گل نے پہلے یک روزہ میچ میں 23.1 اوور میں 124 رن کی شراکت داری کی تھی، لیکن ان کی شروعات دھیمی رہی تھی اور پاور پلے میں محض 40 رن بن پائے تھے۔ انھوں نے اپنی نصف سنچری پوری کی تھی لیکن اسے بڑے اسکور میں نہیں بدل پائے۔ اگر ہندوستان کو ہیملٹن میں اسکور بورڈ پر بڑا اسکور درج کرانا ہے تو دھون اور گل کو جارحانہ انداز دکھاتے ہوئے تیزی سے رن بنانے ہوں گے۔

سوریہ کمار یادو پہلے یک روزہ میچ میں اپنی پہلی گیند پر کور ڈرائیو سے شاندار چوکا لگانے کے بعد آؤٹ ہو گئے تھے۔ رشبھ پنت کو اپنی جدوجہد کو پیچھے چھوڑنا ہوگا اور نمبر چار بلے باز کی شکل میں خود کو ثابت کرنا ہوگا۔ شریئس ایر نے شارٹ گیندوں کی اپنی کمزوری کے باوجود اور کچھ قسمت کا سہارا اٹھاتے ہوئے شاندار 80 رن بنائے تھے جس سے ہندوستان کا اسکور 300 کے پار پہنچا تھا۔ سنجو سیمسن کو انھیں ملے موقع کا فائدہ اٹھانا ہوگا۔ واشنگٹن سندر نے آخری پانچ اوور میں 16 گیندوں پر 37 رن بنائے، یہ ہندوستان کے لیے خوش آئند کہا جا سکتا ہے۔

گیندبازی میں ہندوستان کو چھٹے گیندباز کی کمی کا بہت احساس ہوا جو یک روزہ کرکٹ میں اہم ہے۔ شاردل ٹھاکر نے نئی گیند سے اچھی شروعات کی، لیکن میچ کے آخر میں وہ مہنگے ثابت ہوئے۔ ٹھاکر کے ذریعہ پھینکے گئے ٹیم کے 40ویں اوور میں ٹام لیتھم نے 25 رن بنا دیے جو نیوزی لینڈ کے لیے دباؤ ہٹانے والا ثابت ہوا۔ ٹام لیتھم نے ناٹ آؤٹ 145 رن بنا دیے۔

ہندوستانی تیز گیندباز عرشدیپ سنگھ اور لیگ اسپنر یجویندر چہل نے کافی رن لٹائے جو ہندوستان کے لیے مہنگے ثابت ہوئے۔ صرف واشنگٹن سندر نے اپنی آف اسپن سے اور عمران ملک نے اپنی رفتار سے نیوزی لینڈ کے بلے بازوں کو کچھ حد تک پریشان کیا۔ میزبانوں کے لیے لیتھم کی ناٹ آؤٹ سنچری ایک بڑی خوشخبری کہی جا سکتی ہے جس نے نیوزی لینڈ کو بحران سے باہر نکالا۔ کپتان کین ولیمسن نے بھی اچھے فارم کا مظاہرہ کرتے ہوئے ناٹ آؤٹ 94 رن بنائے اور نیوزی لینڈ نے 307 رن کے مشکل ہدف کو آسانی سے حاصل کر لیا۔

بہرحال، اتوار کو کھیلا جانے والا دوسرا یک روزہ میچ ہندوستان کے لیے ’کرو یا مرو‘ والا مقابلہ ہوگا۔ ہندوستان کو سبھی شعبہ میں بہتری کرتے ہوئے اچھے کھیل کا مظاہرہ کرنا ہوگا۔ دوسرے یک روزہ میچ میں ہندوستان کو ہر حال میں جیت حاصل کرنی ہی ہوگی تاکہ تیسرے اور آخری میچ کو ’فائنل‘ بنایا جا سکے، اور پھر اس کو جیتنے والی ٹیم ہی سیریز کی فاتح ہوگی۔