نیوزی لینڈ کے ساتھ دوسرا میچ آج سے، ہندوستانی ٹیم سیریز بچانے کی کوشش کرے گی

ہندوستانی ٹیم اس وقت نیوزی لینڈ کے خلاف گھر پر 3 میچوں کی ٹیسٹ سیریز کھیل رہی ہے۔ اس کا دوسرا میچ آج یعنی 24 اکتوبرسے پونے کے مہاراشٹر کرکٹ ایسوسی ایشن اسٹیڈیم میں کھیلا جائے گا۔ یہ میچ صبح 9.30 بجے شروع ہوگا۔ واضح رہے پہلا ٹیسٹ جیت کر کیوی یعنی نیوزی لینڈ  ٹیم نے سیریز میں 1-0 کی برتری حاصل کر لی ہے۔

روہت شرما کی کپتانی والی ہندوستانی ٹیم پہلے میچ میں شکست سے بہت پریشان ہے۔ اگر روہت بریگیڈ نیوزی لینڈ کے خلاف سیریز میں واپسی کرنا چاہتی ہے تو اسے دوسرے میچ میں بہترین پلیئنگ 11 کا انتخاب کرنا ہوگا۔بنگلور میں کھیلے گئے پہلے ٹیسٹ میچ کی پہلی اننگز میں ہندوستانی ٹیم صرف 46 رنز بنا کر آؤٹ ہو گئی۔ انہوں نے دوسری اننگز میں اچھا کھیلا لیکن اس کے باوجود انہیں 8 وکٹوں سے شکست کا منہ دیکھنا پڑا۔ ہندوستانی ٹیم اس وقت آئی سی سی ورلڈ ٹیسٹ چیمپئن شپ(ڈبلو ٹی سی) کے پوائنٹس ٹیبل میں سرفہرست ہے، لیکن پہلے میچ میں شکست کی وجہ سے اسے کچھ پوائنٹس سے محروم ہونا پڑا۔

اگلے ماہ پانچ  ٹیسٹ میچوں کی سیریز کے لیے آسٹریلیا کے دورے پر جانے سے پہلے روہت شرما کی قیادت والی ٹیم کی ترجیح نیوزی لینڈ کے خلاف اگلے دو میچوں میں اچھی کارکردگی دکھانا ہو گی۔ اس کے علاوہ موجودہ سیریز جیت کر ڈبلو ٹی سی میں مضبوط پوزیشن بنانا ہوگی۔

شبمن گل واپسی کے لیے تیار ہیں۔ جبکہ کے ایل راہل اور سرفراز خان میں سے کسی ایک کو ان کے لیے جگہ خالی کرنی ہوگی۔ ہیڈ کوچ گوتم گمبھیر راہل کو مزید مواقع دینے کے حق میں ہیں لیکن سرفراز نے بنگلورو میں دوسری اننگز میں 150 رنز بنا کر اپنا دعویٰ مضبوط کر لیا ہے۔

ہندوستان کو سینئر بلے باز روہت شرما اور ویراٹ کوہلی سے بڑی اننگز کی امید ہوگی۔ کوہلی نے 2019-20 کے سیزن میں جنوبی افریقہ کے خلاف 254 رنز کی ناقابل شکست اننگز کھیلی تھی اور وہ اس سے متاثر ہوکر ایک بڑی اننگز کھیلنا چاہیں گے۔ہندوستانی ٹیم انتظامیہ بھلے ہی راہل کی طرفداری کر رہی ہو، لیکن بلے باز گزشتہ کچھ عرصے سے رنز بنانے میں مشکلات کا شکار ہیں۔ دوسری جانب سرفراز نے ایرانی کپ میں ممبئی کے لیے ناقابل شکست 222 رنز بنانے کے بعد بنگلورو میں تمام تر منفی حالات کے باوجود 150 رنز کی شاندار اننگز کھیلی۔

اگر پچ اسپن گیند بازوں کی مدد کرتی ہے تو روی چندرن اشون اور رویندر جڈیجہ اس کا بھرپور فائدہ اٹھانا چاہیں گے۔ واشنگٹن سندر کو بھی ٹیم میں شامل کیا گیا ہے۔ اگر اسے پلیئنگ الیون میں شامل کیا جاتا ہے تو اس سے ہندوستان کی بیٹنگ مضبوط ہوگی۔