انگلینڈ کےتین وکٹ جھٹکنے کے ساتھ ہندوستان کی میچ میں واپسی

تیز گیندباز شاردُل ٹھاکر کی 57 رن کی جارحانہ پاری کی بدولت ہندوستان نے انگلینڈ کے خلاف چوتھے کرکٹ ٹیسٹ میچ کے پہلے دن جمعرات کو خراب شروعات سے ابھرتے ہوئے پہلی پاری میں 191 رن کا چیلنج بھرا اسکور بنا لیا۔ اس کے ساتھ ہندوستان نے ا جوابی حملہ کرتے ہوئے انگلینڈ کے دونوں اوپنر اور ان کے فارم میں چل رہے کپتان جو روٹ کا وکٹ لے کر میچ کو توازن میں کر لیا ہے اور میچ میں واپسی کی۔

انگلینڈ جس نے میچ کا پہلا دن ختم ہونے تک تین وکٹ کے نقصان پر ۵۳ رن بنا لئے تھےاب اس کے سامنے پہلی پاری میں بڑا اسکور بنانے کا ہدف رہے گا ۔ہندوستانی تیز گیندباز جسپریت بمراہ نے چوتھے اوور میں دوسری گیند پر روری برنس کو بولڈ کیا اور پھر آخری گیند پر حسیب حمید کو پنت کے ہاتھوں کیچ کروا دیا۔ محض چھ رن پر دو وکٹ گر جانے کے بعد ڈیوڈ ملان اور روٹ نے تیسرے کرکٹ کے لیے 46 رن کا اضافہ کیا۔ یہ شراکت داری زیادہ خطرناک ہو پاتی کہ اس سے پہلے امیش یادو نے روٹ کو ایک بہترین گیند پر بولڈ کر دیا۔ روٹ نے 46 گیندوں میں چار چوکے کے سہارے 26 رن بنائے۔ اسٹمپس کے وقت ملان 21 اور نائٹ واچمین کریگ اورٹن ایک رن بنا کر میدان پر ڈٹے ہوئے ہیں۔

ہندوستان اور انگلینڈ کے مابین کھیلے جانے والا یہ میچ اب دلچسپ ہو گیا ہے کیونکہ ہندوستان کی خراب شروعات کے بعد اس نے میچ میں واپسی کی ہے ۔ اگر آج ہندوستان انگلینڈ کے وکٹ جلدی گرا لیتا ہے تو میچ میں کڑا مقابلہ ہو جائے گا۔