ٹی-20 خواتین عالمی کپ میں ہندوستان کی خراب شروعات، نیوزی لینڈ نے 58 رنز سے ہرایا

خواتین  ٹی ٹوئنٹی عالمی کپ کے اپنے پہلے میچ میں ہندوستان کو نیوزی لینڈ کے ہاتھوں 58 رنز سے عبرتناک شکست کا سامنا کرنا پڑا۔ ہندوستان  کی جانب سے سب سے زیادہ رنز کپتان ہرمن پریت کور نے بنائے جنہوں نے 15 رنز کی اننگز کھیلی۔ ایڈن کارسن نے ٹیم انڈیا کو ابتدائی جھٹکا دیا۔ کسی بھی وکٹ کے لیے بڑی شراکت داری کا نہ ہونا اس میچ میں ٹیم انڈیا کی شکست کی ایک بڑی وجہ بن گیا۔

اس میچ میں نیوزی لینڈ نے ٹاس جیت کر پہلے بیٹنگ کا فیصلہ کیا۔ پہلی اننگز میں نیوزی لینڈ نے 15 اوورز میں 109 رنز بنائے تھے لیکن آخری 5 اوورز میں کپتان سوفی ڈیوائن اور دیگر بلے بازوں نے مل کر متحرک انداز میں بیٹنگ کی۔ کپتان سوفی نے 36 گیندوں پر 57 رنز کی اننگز کھیل کر کیوی ٹیم کے اسکور کو 160 رنز تک پہنچانے میں اہم کردار ادا کیا۔ ٹیم انڈیا کی جانب سے رینوکا سنگھ نے 2 وکٹیں حاصل کیں، دوسری جانب اروندھتی ریڈی اور آشا شوبھنا نے ایک ایک وکٹ حاصل کی۔

جواب میں ہدف کا تعاقب کرنے آئی ہندوستانی ٹیم کی شروعات انتہائی خراب رہی کیونکہ ٹیم نے 42 رنز کے اسکور تک تینوں ٹاپ آرڈر بلے بازوں کی وکٹیں گنوا دیں۔ مڈل آرڈر میں جمائمہ روڈریگز اور ریچا گھوش بھی بالترتیب 13 اور 12 رنز بنانے کے بعد پویلین لوٹ گئیں۔ جب اسکور 75 تھا تب تک آدھی ٹیم پویلین لوٹ چکی تھی۔ ہندوستان نے اگلے 27 رنز کے اندر باقی 5 وکٹیں گنوا دیں۔

نیوزی لینڈ کی روزمیری مائر اور لیا طاہو نے بولنگ میں تہلکہ مچا دیا۔ روزمیری نے 4 اوورز میں 19 رنز دے کر 4 وکٹیں حاصل کیں، دوسری جانب لیا نے بھی 3 وکٹیں حاصل کیں۔ اب ٹیم انڈیا کو اگلا میچ 6 اکتوبر کو پاکستان کے خلاف کھیلنا ہے۔ جہاں ہندوستان اپنا پہلا میچ 58 رنز سے ہارا ، وہیں پاکستان نے اپنے پہلے میچ میں سری لنکا کو 31 رنز سے شکست دی ہوئی ہے۔