ہندوستان نے سری لنکا  کو دی شکست، سنسنی خیز جیت سےسیمی فائنل کی امیدیں برقرار

خواتین ٹی ٹوینٹی عالمی کپ 2024 کے ایک اہم میچ میں ہندوستان  نے سری لنکا کو شکست دے دی ۔ ہرمن پریت کور کی قیادت میں ہندوستانی ٹیم نے 82 رنز کے بڑے مارجن سے شاندار جیت درج کی۔ اس جیت کے ساتھ ہی ٹیم انڈیا نے سیمی فائنل کی اپنی امیدیں برقرار رکھی ہیں۔ پہلے بیٹنگ کرنے آئی ہندوستانی ٹیم نے مقررہ 20 اوورز میں 3 وکٹوں پر 172 رنز بنائے۔ اس طرح سری لنکا کو 173 رنز کا ہدف ملا تھا لیکن چماری اٹا پٹو کی کپتانی میں سری لنکن ٹیم 19.5 اوورز میں صرف 90 رنز تک محدود ہو گئی۔

سری لنکا کی جانب سے کاوشکا دلہری نے سب سے زیادہ 21 رنز بنائے۔ جبکہ انوشکا سنجیوانی نے 22 گیندوں پر 20 رنز کی اننگز کھیلی۔ اما کنچنا نے 22 گیندوں میں 19 رنز بنائے لیکن اس کے علاوہ دیگر 8 بلے باز دو ہندسوں کو  بھی عبور نہ کر سکے۔ سری لنکا کی سب سے بڑی امید، کپتان چماری اٹا پٹو صرف 1 رن بنانے کے بعد پویلین لوٹ گئیں۔

ہندوستانی گیند بازوں کی بات کریں تو انرودھتی ریڈی اور آشا شوبھنا نے  تین تین وکٹیں حاصل کیں۔ رینوکا سنگھ ٹھاکر کو 2 کامیابیاں ملی ہیں۔ اس کے علاوہ شریانکا پاٹل اور دیپتی شرما نے ایک ایک وکٹ حاصل کی۔

ٹاس جیت کر پہلے بلے بازی کرنے آئی ہندوستانی ٹیم نے 20 اوور میں 3 وکٹ پر 172 رن بنائے۔ اس طرح چماری اٹا پٹو کی قیادت میں سری لنکا کو 173 رنز کا ہدف ملا ہے۔ ہندوستان  کی جانب سے کپتان ہرمن پریت کور نے طوفانی اننگز کھیلی۔ ہندوستانی کپتان نے 27 گیندوں پر 52 رنز بنائے۔ انہوں نے اپنی اننگز میں 8 چوکے اور 1 چھکا لگایا۔ جبکہ اوپنر اسمرتی مندھانا نے 38 گیندوں میں 50 رنز بنائے۔ اس کے علاوہ شیفالی ورما نے 40 گیندوں پر 43 رنز بنائے۔