ہند-بنگلہ دیش ٹیسٹ: 147 سالہ ٹیسٹ تاریخ میں پہلی بار محض 3 اوورس میں بنے 50 رن، ہندوستان نے رقم کی تاریخ

بنگلہ دیش کے خلاف جاری دوسرے ٹیسٹ مقابلے کے چوتھے دن آج ہندوستان نے بے مزہ ہوتے ٹیسٹ میچ کو انتہائی دلچسپ موڑ پر لا کر کھڑا کر دیا۔ ہندوستان اور بنگلہ دیش کے درمیان دو ٹیسٹ میچوں کی سیریز کے اس آخری ٹیسٹ میچ کے پہلے دن کا نصف کھیل بارش سے متاثر ہوا تھا، اور پھر دوسرے و تیسرے دن کا پورا کھیل بارش کی نذر ہو گیا۔ آج جب بنگلہ دیش کی پہلی اننگ 233 رنوں پر ختم ہوئی، تو لگ رہا تھا جیسے یہ ٹیسٹ ڈرا کی طرف بڑھ رہا ہے۔ لیکن کپتان روہت شرما نے کچھ الگ ہی سوچ رکھا تھا۔ انھوں نے میدان میں اترتے ہی ایسی آتشی بلے بازی شروع کی کہ ہر کوئی دیکھتا رہ گیا۔ روہت کوئی بڑی اننگ نہیں کھیل سکے، لیکن ان کے انداز کو دوسرے بلے بازوں نے اختیار کیا، اور پھر میچ دلچسپ مرحلہ میں داخل ہو گیا۔

اس درمیان ہندوستانی کی سلامی جوڑی نے وہ کارنامہ انجام دیا جو 147 سال کی ٹیسٹ تاریخ میں آج تک نہیں ہو سکی۔ روہت شرما اور یشسوی جیسوال نے محض 3 اوورس میں 50 رن پورے کر لیے۔ کپتان روہت نے محض 6 گیندوں میں 19 رن بنائے، جبکہ جیسوال نے 13 گیندوں پر 30 رن بنائے۔ 2 رن ایکسٹرا بھی ملے۔ یعنی 3 اوورس میں ہندوستان کے 51 رن بن گئے تھے۔ روہت شرما کی طوفانی اننگ کو مہدی حسن میراز نے ختم کیا۔ وہ 11 گیندوں میں 23 رن بنا کر پویلین لوٹے۔

روہت-جیسوال کی جوڑی نے ٹیسٹ تاریخ کی تیز ترین نصف سنچری شراکت داری جب پوری کی تو انھوں نے انگلش ٹیم کا ریکارڈ توڑا جس نے ویسٹ انڈیز کے خلاف ناٹنگھم ٹیسٹ میں 4.2 اوورس میں 50 رن بنائے تھے۔ انگلینڈ نے ایسا 2024 میں دو مرتبہ کیا ہے۔ ایک بار ناٹنگھم میں اور پھر برمنگھم میں ویسٹ انڈیز کے ہی خلاف۔ اس سے قبل 30 سال قبل یہ ریکارڈ بھی انگلینڈ کے ہی نام تھا جب اس نے 1994 میں جنوبی افریقہ کے خلاف 4.3 اوورس میں 50 رن بنائے تھے۔ بہرحال، اب یہ ریکارڈ ہندوستان کے نام درج ہو چکا ہے۔