آئی سی سی کی ’ٹیم آف ٹورنامنٹ‘ میں 6 ہندوستانی کرکٹرس کو ملی جگہ، روہت شرما بنے کپتان

آئی سی سی نے عالمی کپ 2023 کی ’ٹیم آف دی ٹورنامنٹ‘ کا اعلان کر دیا ہے۔ اس ٹیم میں بے مثال کارکردگی کا مظاہرہ کرنے والے 6 ہندوستانی کرکٹرس کو جگہ ملی ہے۔ ان کھلاڑیوں میں روہت شرما، وراٹ کوہلی اور محمد سمیع کے نام بھی شامل ہیں۔ عالمی کپ ٹورنامنٹ میں ہندوستان نائب فاتح رہا۔ احمد آباد میں کھیلے گئے فائنل مقابلے میں آسٹریلیا سے 6 وکٹ کی شکست کے ساتھ ہی ہندوستان کی 10 میچوں کی جیت کا سلسلہ بھی ختم ہو گیا، لیکن ہندوستانی کھلاڑیوں کی کارکردگی ٹورنامنٹ میں ناقابل فراموش رہی۔

50 اوورس کے عالمی کپ میں لگاتار دوسری بار ’ٹیم آف دی ٹورنامنٹ‘ میں جگہ بنانے والے روہت شرما نے ہدنوستان کے لیے سلامی بلے باز کے طور پر بہت اہم کردار نبھایا۔ چنئی میں آسٹریلیا کے خلاف صفر پر آؤٹ ہونے کے بعد روہت شرما نے افغانستان کے خلاف صرف 84 گیندوں میں 131 رنوں کی طوفانی اننگ کھیلی تھی اور پلیئر آف دی میچ رہے تھے۔ وراٹ کوہلی ٹورنامنٹ مین سب سے زیادہ رن بنانے والے بلے باز بنے۔ محمد سمیع ٹورنامنٹ میں سب سے زیادہ 24 وکٹ لینے والے گیندباز بنے۔ ان تینوں کے علاوہ رویندر جڈیجہ، جسپریت بمراہ اور کے ایل راہل کو ’ٹیم آف دی ٹورنامنٹ‘ میں جگہ ملی ہے۔ بمراہ بھی لگاتار دوسری بار آئی سی سی کے ’ٹیم آف دی ٹورنامنٹ‘ کا حصہ بنے ہیں۔

آئی سی سی کے ’ٹیم آف دی ٹورنامنٹ‘ میں شامل دیگر کھلاڑیوں کی بات کی جائے تو آسٹریلیا کے دو کھلاڑیوں آل راؤنڈر گلین میکسویل اور لیگ اسپنر ایڈم زیمپا، جنوبی افریقہ کے کوئنٹن ڈیکوک، نیوزی لینڈ کے ڈیرل مشیل اور سری لنکا کے دلشان مدوشنکا کو عالمی کپ میں بہترین کارکردگی کا ثمرہ دیا گیا ہے۔ جنوبی افریقہ کے گیرالڈ کویٹزی کو بارہواں کھلاڑی مقرر کیا گیا ہے۔

2023 عالمی کپ کی آئی سی سی ٹیم اس طرح ہے: کوئنٹن ڈیکوک (وکٹ کیپر)، روہت شرما (کپتان)، وراٹ کوہلی، ڈیرل مشیل، کے ایل راہل، گلین میکسویل، جسپریت بمراہ، دلشان مدوشنکا، ایڈم زیمپا، رویندر جڈیجہ، محمد سمیع۔