کیا ان کیپڈ نیا تیز گیندباز ہندوستان بنگلہ دیش سیریز میں نظر آئے گا!

جب سے گوتم گمبھیر ٹیم انڈیا کے ہیڈ کوچ بنے ہیں ان سے کئی طرح کی توقعات وابستہ کی جارہی ہیں۔ گمبھیر کا پہلا اسائنمنٹ سری لنکا کا دورہ تھا، جہاں ٹیم انڈیا نے T20 سیریز جیتی اور ون ڈے سیریز ہاری ۔ اب مین ان بلیو کی اگلی سیریز بنگلہ دیش کے خلاف ہو گی۔ بنگلہ دیش کی ٹیم 2 ٹیسٹ اور 3 ٹی ٹوئنٹی میچوں کی سیریز کے لیے ہندوستان کا دورہ کرے گی۔ گوتم گمبھیر نے ٹیسٹ سیریز کے لیے ایک نیا ان کیپڈ تیز گیند باز  ڈھونڈ لیا ہے جو ہندوستان  کی ٹیم کے ساتھ نظر آئے گا۔

دراصل گمبھیر کی یہ نئی دریافت یدھویر سنگھ ہیں، جو لکھنؤ سپر جائنٹس کے لیے کھیلنے والے تیز گیند باز ہیں۔ کےاسپورٹس واچ کی رپورٹ کے مطابق یدھویر بنگلہ دیش کے خلاف ٹیسٹ سیریز میں نیٹ گیند باز کے طور پر ٹیم انڈیا میں شامل ہوں گے۔ 140-145 کی رفتار سے گیند کرنے والے یدھویر پریکٹس میں ٹیم انڈیا کے لیے بہت اہم کڑی ثابت ہو سکتے ہیں۔ اس کے علاوہ  انہیں خود کو ثابت کرنے کا بھی اچھا موقع ملے گا۔

رپورٹ میں ایک ذریعہ کے حوالے سے کہا گیا ہے، "انہیں کل ایک فون آیا اور 12 ستمبر کو چنئی میں رپورٹ کرنے کو کہا گیا ہے۔ یہ ان کے لیے بہت اچھی خبر ہے - ہندوستانی ٹیم میں جگہ بنانے کی طرف ایک قدم"۔

واضح رہے کہ یدھویر نے لکھنؤ کے لیے اب تک پانچ میچ کھیلے ہیں۔ انہیں 2023 میں 3 اور 2024 میں 2 میچ کھیلنے کا موقع ملا۔ یدھویر نے لکھنؤ کے لیے 5 میچوں میں 4 وکٹ لیے۔ واضح رہے کہ وہ جموں و کشمیر کے لیے فرسٹ کلاس کرکٹ کھیلتے ہیں۔26 سالہ یدھویر نے اب تک صرف 4 فرسٹ کلاس میچ کھیلے ہیں جس میں انہوں نے 3 وکٹیں حاصل کی ہیں۔ اس کے علاوہ انہوں نے بیٹنگ میں 79 رنز بنائے ہیں۔