چوتھا ٹیسٹ: چھ وکٹ گرنے کے بعد ٹیم انڈیا کو پنت اور سندر نے سنبھالا، اسکور 200 کے پار

احمد آباد: چوتھے اور آخری ٹسٹ میچ کے دوسرے دن جمعہ کے روز ہندوستان نے اپنی پہلی اننگز میں 153 رن پر چھ وکٹیں گنوا دیں، تاہم اس کے بعد وکٹ کیپر بیٹس مین رشبھ پنت اور واشنگٹن سندر نے ٹیم کو کچھ حد تک سنبھالا۔ پنت نصف سنچری اسکور کر کے میدان پر ٹکے ہوئے ہیں جبکہ سندر 25 رن بنا کر ان کا ساتھ دے رہے ہیں۔

ہندوستان نے آج اپنی اننگز کا آغاز ایک وکٹ پر 24 رنوں سے آگے کھیلنا شروع کیا۔ 24 رنوں سے آگے کھیلتے ہوئے روہت شرما اور چیتشور پجارا صرف 16 رنوں کا ہی اضافہ کرنے میں کامیاب ہو پائے۔ ہندوستان کا دوسرا وکٹ 40 رن کے اسکور پر پجارا کی شکل میں گرا۔ بائیں ہاتھ کے اسپنر جیک لیچ نے پجارا کو 17 رنز پر آؤٹ کیا۔ پجارا نے 66 گیندوں پر 17 رن بنائے۔ اس کے بعد بیٹنگ کرنے آئے کپتان وراٹ کوہلی بغیر کھاتہ کھولے ہی پویلین لوٹ ہوگئے۔ میڈیم فاسٹ بالر بین اسٹوکس نے وراٹ کو وکٹ کیپر بین فاکس کے ہاتھوں صفر پر کیچ کرایا۔

اسٹوکس کی اٹھتی ہوئی گیند وراٹ کے دستانے کو چھوتی پوئی وکٹ کیپر کے ہاتھ میں چلی گئی۔ حالانکہ وراٹ نے میچ سے قبل دفاع کے بارے میں کافی باتیں کی تھیں، لیکن جس گیند پر وہ آؤٹ ہوئے اس پر انہوں نے انتہائی ناقص دفاع کا مظاہرہ کیا اور اپنا وکٹ گنوا بیٹھے۔ وراٹ کو آؤٹ ہونا تھا کہ اسٹیڈیم میں خاموشی چھائی گئی۔ وراٹ 27 ویں اوور میں تیسرے وکٹ کے طور پر گرا، اس وقت ٹیم انڈیا کا اسکور 41 تھا۔ تجربہ کار فاسٹ بالر جیمس اینڈرسن نے دوسرے روز اپنا کھاتا کھولا اور نائب کپتان اجنکیا رہانے کو 27 رنز پرآؤٹ کیا۔ 80 کے اسکور پر یہ ہندوستان کا چوتھا وکٹ تھا۔ رہانے نے 45 گیندوں پر 27 رن بنائے۔

اگر کسی بھی ہندوستانی بلے باز کو اعتماد کے ساتھ کھیلتے دیکھا گیا تو وہ وہ اوپنر روہت شرما تھے۔ وہی اکلوتے بلے باز تھے جنہوں نے صبح سے ہی ہندوستانی اننگز کو جاری رکھا۔ روہت نے صبح آٹھ رن سے کھیل کا آغاز کیا اور پجارا کے ساتھ دوسری وکٹ کے لئے 40 رنز کی شراکت کی۔ انہوں نے رہانے کے ساتھ چوتھے وکٹ کے لئے 39 رنز کا اضافہ کیا اور پھر پنت کے ساتھ پانچویں وکٹ کے لئے 41 رن کی شراکت قائم کی۔

اچھی فارم میں کھیل رہے روہت شرما کو اسٹوکس نے آؤٹ کیا۔ روہت نے 144 گیندوں میں 49 رن میں سات چوکے لگائے اس کے بعد 121 کے مجموعی اسکور پر روہت کا وکٹ گر گیا۔ روی چندرن اشون 13 رنز بنا کر جیک لیچ کا شکار بنے۔ اشون کا وکٹ 146 کے اسکور پر گرا اور اس کے فوراً بعد ہی چائے کا وقفہ ہوگیا۔