کرکٹر محمد سراج کی انگریزی دانی سے مداحوں کو خوشگوار حیرت

حیدرآباد: حیدرآباد کے تیز گیند باز محمد سراج نے ہند۔ نیوزی لینڈ کے مابین کھیلی گئی تین میچوں کی ٹی۔20 سیریز کے آخری میچ میں پلیر آف دی میچ کا اعزاز حاصل کرنے کے بعد انگریزی میں دیئے گئے انٹرویو سے تمام کو خوشگوار طور پر حیرت زدہ کر دیا۔ عموماً محمد سراج، حیدرآبادی زبان میں ہی بات کرتے ہیں اور انٹرویو دیتے ہیں تاہم ان کی گزشتہ روز انگریزی دانی نے تمام کو حیرت زدہ کر دیا۔

میزبان ملک کے میک لین پارک، نیپیر میں کھیلا گیا آخری میچ جو، ڈک ورتھ لیوس نظام کے سبب ٹائی قرار دیا گیا، جس میں محمد سراج نے نہ صرف کفایتی بولنگ کرتے ہوئے چار اوورس میں صرف 17 رنز دے کر چار اہم وکٹس حاصل کئے بلکہ انہوں نے ڈائرکٹ ہٹ مارتے ہوئے ایک رن آوٹ بھی کیا۔ ان کے اس مظاہرہ پر ان کو پلیر آف دی میچ کا ایوارڈ دیا گیا۔ حیدرآبادی کرکٹر کو پہلی مرتبہ ٹی۔20 میچ میں پلیر آف دی میچ کا اعزاز دیا گیا۔ اپنا اعزازحاصل کرنے کے بعد محمد سراج نے انگریزی میں انٹرویو دیتے ہوئے کہا کہ انہیں خوشی محسوس ہو رہی ہے۔ یہ وکٹ بلے بازی کے لئے آسان نہیں تھی۔ اس پر باؤنس ہو رہا تھا۔

محمد سراج نے ہار ڈلینتھ کے ساتھ بولنگ کے لئے تیاری کی تھی، وائٹ بال سے کافی پریکٹس کی تھی اور اپنے منصوبہ کو عملی جامہ پہنایا۔ سیریز میں کامیابی پر انہیں خوشی ہو رہی ہے۔ اس طرح پہلی مرتبہ انگریزی میں انٹرویو دیتے ہوئے محمد سراج نے تمام لوگوں کو خوشگوار حیرت زدہ کردیا۔ واضح رہے کہ آئی پی ایل اور دوسری سیریز میں بہتر مظاہرہ پر انہیں دیئے گئے، پلیر آف دی میچ ایوارڈ کے بعد محمد سراج قبل ازیں صرف خالص حیدرآبادی زبان میں ہی انٹرویو دیا کرتے تھے۔ ہندوستان نے یہ سیریز جیت لی ہے۔