چنئی کو پہلی جیت کے لیے اپنی پرانی شکل میں آنا ہوگا

ممبئی: آئی پی ایل میں اپنے بدترین دور سے گزر رہی چنئی سپر کنگز کو ٹورنمنٹ میں اپنی پہلی جیت درج کرنے کے لیے منگل کو انفارم رائل چیلنجرز بنگلور کے خلاف ہونے والے میچ میں اپنی پرانی فارم دکھانی ہوگی۔ چنئی کے لیے یہ پہلا موقع ہے کہ دفاعی چیمپئن ہونے کے باوجود وہ اپنے پہلے چار میچ ہارچکی ہے اور پوائنٹس ٹیبل میں 10ویں اور آخری نمبر پر ہے۔ چنئی کو اگر مقابلہ میں برقرار رہنا ہے تو اسے میچ جیتنا شروع کرنا ہوں گے اور یہ کام اسے اپنے پرانے کھلاڑی فاف ڈو پلیسس کی کپتانی والی ٹیم رائل چیلنجرز بنگلور کے خلاف شروع کرنا ہوگا۔ بنگلورو اس وقت بہترین فارم میں ہے اور اس نے چار میں سے تین میچ جیتے ہیں۔ بنگلورو کے سابق کپتان وراٹ کوہلی بھی شاندار فارم میں چل رہے ہیں۔

چنئی کا سب سے بڑا مسئلہ ان کا بولنگ اٹیک ہے جو دیپک چاہر کے بغیر ادھورا لگتا ہے۔ چاہر انجری کی وجہ سے ٹیم سے باہر ہیں۔ سلامی بلے باز رتوراج گائیکواڈ بھی خراب دور سے گزر رہے ہیں جبکہ کپتان رویندر جڈیجہ گیند اور بلے سے ویسا کمال نہیں دکھا پا رہے ہیں جیسا انہوں نے پچھلے سیزن میں دکھایا تھا۔ آئی پی ایل کے آغاز سے دو دن قبل کپتانی چھوڑنے والے مہندر سنگھ دھونی ایک پچاسے کے علاوہ اب تک زیادہ کچھ نہیں کرپائے ہیں۔

اگر چنئی اس اہم میچ میں کچھ نہیں کر پاتی ہے تو ان کے لیے اپنا ٹائٹل بچانا بہت دور کی بات ہو گی۔ بنگلور کے لیے بھی ایک بری خبر ہے۔ اس کے اہم تیزگیندباز ہرشل پٹیل اپنی بہن کی موت کے سبب آئی پی ایل بائیو ببل سے باہر ہو گئے ہیں۔ ہفتہ کو ممبئی انڈینس کے خلاف میچ کے بعد وہ ببل سے باہر نکل کر اپنے خاندان کے پاس چلے گئے۔ یہ واضح ہے کہ ہرشل منگل کو چنئی سپر کنگز کے خلاف میچ میں شرکت نہیں کریں گے۔ آئی پی ایل بائیو ببل میں دوبارہ واپس آنے کے لیے انہیں کم از کم تین دن قرنطینہ میں رہنا پڑے گا۔