بنگلہ دیشی آل راؤنڈر شکیب الحسن نے اچانک ریٹائرمنٹ کا کیا اعلان، ٹی-20 اور ٹیسٹ کرکٹ کو کہا الوداع!

بنگلہ دیش کی کرکٹ ٹیم اس وقت ہندوستان میں ہے اور 2 میچوں کی ٹیسٹ سیریز کا دوسرا و آخری میچ 27 ستمبر یعنی کل سے کانپور کے گرین پارک اسٹیڈیم میں کھیلا جائے گا۔ اس سے عین قبل بنگلہ دیش کے مشہور آل راؤنڈر شکیب الحسن نے ریٹائرمنٹ کا اعلان کر دیا ہے۔ انھوں نے ٹی-20 اور ٹیسٹ فارمیٹ سے ریٹائرمنٹ کا فیصلہ کیا ہے، یعنی یک روزہ کرکٹ کھیلنا وہ جاری رکھیں گے۔

کانپور ٹیسٹ میچ شروع ہونے سے ایک دن قبل پریس کانفرنس سے خطاب کرتے ہوئے شکیب الحسن نے کہا کہ وہ فوری اثر سے ٹی-20 کرکٹ چھوڑ رہے ہیں، جبکہ ٹیسٹ میچ چھوڑنے کے لیے انھوں نے بنگلہ دیش کے میرپور میدان کا انتخاب کیا ہے۔ انھوں نے کہا کہ بنگلہ دیش کرکٹ بورڈ (بی سی بی) کو یہ خواہش ظاہر کی ہے کہ وہ آئندہ ماہ میر پور میں جنوبی افریقہ کے خلاف ہونے والی گھریلو سیریز کے آخر میں ٹیسٹ کرکٹ سے سبکدوش ہوں گے۔ لیکن شکیب الحسن کو اس سیریز میں کھیلنے کے لیے سیکورٹی منظوری نہیں ملتی ہے تو کانپور ٹیسٹ میچ ہی ان کے ٹیسٹ کیریئر کا آخری میچ ہوگا۔

شکیب الحسن کا کہنا ہے کہ ’’میں نے بی سی بی سے میرپور میں اپنا آخری ٹیسٹ کھیلنے کی خواہش ظاہر کر دی ہے۔ میں نے یہ بات بی سی بی کو بتائی ہے اور وہ مجھ سے متفق ہیں۔ وہ سب انتظام کرنے کی کوشش کر رہے ہیں تاکہ میں بنگلہ دیش جا سکوں۔ اگر ایسا نہیں ہوتا ہے تو کانپور میں ہندوستان کے خلاف میچ ٹیسٹ کرکٹ میں میرا آخری میچ ہوگا۔‘‘ ساتھ ہی انھوں نے کہا کہ کرکٹ کے سب سے چھوٹے فارمیٹ (ٹی-20) میں اپنا آخری میچ وہ ٹی-20 عالمی کپ 2024 میں کھیل چکے ہیں۔

قابل ذکر ہے کہ شکیب الحسن کا شمار بنگلہ دیش کے سب سے کامیاب کھلاڑیوں میں کیا جاتا ہے۔ شکیب دنیا کے سب سے شاندار آل راؤنڈرس میں سے بھی ایک ہیں۔ انھوں نے بنگلہ دیش کے لیے ابھی تک 70 ٹیسٹ میچ کھیلے ہیں۔ اس دوران شکیب الحسن نے 4600 رن بنائے ہیں جس میں 31 نصف سنچری اور 5 سنچری شامل ہیں۔ ان میچوں میں انھوں نے 242 وکٹ بھی لیے ہیں جس میں 19 مرتبہ اننگ میں 5 وکٹ لینے کا کارنامہ بھی شامل ہے۔

شکیب کے ٹی-20 کیریئر کی بات کریں تو انھوں نے بنگلہ دیش کے لیے مجموعی طور پر 129 میچ کھیلے۔ ان میچوں میں انھوں نے 2551 رن بنائے اور 149 وکٹ لیے۔ علاوہ ازیں شکیب الحسن نے بنگلہ دیش کے لیے 247 یک روزہ میچ بھی کھیلے ہیں۔ یک روزہ میچوں میں انھوں نے 7570 رن بنائے اور 317 وکٹ اپنے نام کیے۔