ایشیائی کھیل: ہندوستانی کرکٹ ٹیم سیمی فائنل میں پہنچی، نیپال کو 23 رنز سے شکست

ہانگزو: ہندوستانی کرکٹ ٹیم ایشین گیمز 2023 کے سیمی فائنل میں پہنچ گئی ہے۔ آج (3 اکتوبر) کوارٹر فائنل میچ میں ہندوستان نے نیپال کو 23 رنز سے شکست دے کر آخری چار میں رسائی حاصل کر لی۔ ہندوستانی ٹیم کی جیت کے ہیرو یشسوی جیسوال تھے جنہوں نے سنچری بنا کر ٹیم انڈیا کو 200 کا ہندسہ عبور کرنے کی بنیاد فراہم کی۔

چین کے شہر ہانگزو میں کھیلے گئے اس میچ میں ہندوستانی ٹیم کے کپتان رتوراج گائیکواڑ نے ٹاس جیت کر پہلے بلے بازی کرنے کا فیصلہ کیا۔ ہندوستانی ٹیم نے مضبوط آغاز کیا اور یشسوی اور رتوراج کے درمیان پہلی وکٹ کے لیے 103 رنز کی شراکت ہوئی۔ رتوراج 23 گیندوں پر 25 رنز بنانے کے بعد آؤٹ ہوئے۔

اس کے بعد ہندوستان نے جلد ہی تلک ورما (2) اور وکٹ کیپر جیتیش شرما (5) کی وکٹیں کھو دیں۔ تاہم دوسرے سرے سے یشسوی کی دھماکہ خیز بلے بازی جاری رہی۔ یشسوی جیسوال 49 گیندوں میں 100 رنز بنانے کے بعد آؤٹ ہوئے۔ آخر میں شیوم دوبے (25) اور رنکو سنگھ (37) نے تیز اننگز کھیلی اور ہندوستانی ٹیم کو 202 رنز تک پہنچا دیا۔

نیپال نے 203 رنز کے بڑے ہدف کا محتاط انداز میں تعاقب کیا اور اوپننگ جوڑی نے ٹیم کو اچھا آغاز فراہم کیا۔ کشال بھرتل اور آصف شیخ نے پہلی وکٹ کے لیے 29 رنز جوڑے۔ آصف 10 رنز بنانے کے بعد آؤٹ ہوئے۔ بھورتل نے 28 رنز کی اننگز کھیلی۔ تیسری پوزیشن پر آنے والے کشال مالا نے بھی 29 رنز بنائے۔ تاہم اس دوران نیپال کا رن ریٹ 7 کے آس پاس رہا۔ ٹاپ کے 3 بلے بازوں کے پویلین لوٹنے کے بعد کپتان روہت پاوڈل (3) بھی جلد ہی پویلین لوٹ گئے۔ اس دوران نیپال کا سکور 11 اوورز میں 4 وکٹ پر 77 رنز تھا۔

یہاں سے دیپندرا نے 15 گیندوں پر 32 رن اور سندیپ نے 12 گیندوں پر 29 رن بنا کر نیپال کو مقابلہ میں لا دیا۔ کرن نے بھی 18 رنز بنائے اور جدوجہد کی ۔ تاہم ان تینوں کی اننگز نیپال کو فتح نہ دلا سکی کیونکہ نچلے آرڈر کے بلے باز زیادہ دیر تک پچ پر نہیں ٹھہر سکے۔ آخر میں نیپال کی ٹیم 20 اوورز میں 9 وکٹوں کے نقصان پر صرف 179 رنز بنا سکی۔ ہندوستان کی جانب سے روی بشنوئی اور اویش خان نے 3-3 وکٹیں حاصل کیں۔ ارشدیپ سنگھ نے 2 وکٹیں حاصل کیں۔ جبکہ سائی کشور نے ایک وکٹ حاصل کی۔