گرین پچ پر ہوگا احمد آباد ٹیسٹ! اب تیز گیندبازوں کے سامنے ہوگا بلے بازوں کا امتحان

احمد آباد: ٹیم انڈیا اور آسٹریلیا کے درمیان 4 میچوں کی ٹیسٹ سیریز کا آخری میچ 9 مارچ سے احمد آباد میں کھیلا جائے گا۔ ہندوستانی ٹیم اس سیریز میں 2-1 سے آگے ہے۔ یہ میچ ہندوستانی ٹیم کے لیے خاص طور پر عالمی ٹیسٹ چیمپئن شپ کے لحاظ سے اہم ہے۔ جبکہ آسٹریلیا کو اگر اس سیریز کو برابری پر ختم کرنا ہے تو اسے آخر میچ ہر حال میں جیتنا ہوگا۔

ورلڈ ٹیسٹ چیمپئن شپ کے فائنل میں جگہ بنانے کے لیے ہندوستانی ٹیم کو یہ میچ کسی بھی قیمت پر جیتنا ہوگا۔ جبکہ آسٹریلوی ٹیم پہلے ہی ورلڈ ٹیسٹ چیمپئن شپ کے فائنل میں پہنچ چکی ہے۔ اگر ہندوستانی ٹیم احمد آباد ٹیسٹ میں ہار جاتی ہے یا میچ ڈرا رہتا ہے تو سری لنکا کی نیوزی لینڈ کے خلاف ٹیسٹ سیریز میں ہار یا برابری کی صورت میں ہی ہندوستان فائنل میں پہنچ سکتا ہے۔

خیال رہے کہ سیریز کا تیسرا میچ اندور میں کھیلا گیا تھا جوکہ ڈھائی دن میں ہی ختم ہو گیا تھا۔ لہذا اس پچ کو سخت تنقید کا نشانہ بنایا گیا لیکن اب چوتھا میچ احمد آباد میں کھیلا جانا ہے۔ رپورٹ کے مطابق دو پچوں کو کور کیا گیا ہے اور یہ میچ کس پچ پر ہوگا اس کا انکشاف نہیں کیا گیا ہے۔

سوشل میڈیا پر بھی کچھ ایسا ہی دعویٰ کیا جا رہا ہے اور دونوں پچوں کی تصاویر بھی شیئر کی جا رہی ہیں۔ ان تصاویر میں دیکھا جا سکتا ہے کہ ایک پچ پر گھاس نظر آ رہی ہے۔ پچ پر لگاتار پانی دیا جا رہا ہے اور رولر بھی چلایا جا رہا ہے۔

رپورٹ کے مطابق دو میں سے ایک پچ کافی سبز ہے یعنی اس پر بہت زیادہ گھاس ہے۔ اس پر یہ میچ ہو سکتا ہے۔ اگر ایسا ہوا تو یہاں فاسٹ باؤلرز کا غلبہ رہے گا۔ گھاس کی پچ تیز گیند بازوں کے لیے مددگار سمجھی جاتی ہے لیکن ہندوستان میں پچ ایک رات میں بھی سبز سے خاکی ہو سکتی ہے اور ایسا کئی بار دیکھا گیا ہے۔

سیریز کا چوتھا ٹیسٹ میچ کس پچ پر کھیلا جائے گا، اس کا فیصلہ میچ سے عین قبل کیا جائے گا۔ ایسے میں اندازہ نہیں لگایا جا سکتا کہ پچ کیسی ہوگی۔ خیال رہے کہ 2021 میں ہندوستان اور انگلینڈ کے درمیان اسی مقام پر دو ٹیسٹ میچ کھیلے گئے تھے۔ پھر دو مختلف پچوں پر میچز ہوئے۔ ان میں سے ایک ٹیسٹ میچ صرف دو دن میں ہی ختم ہو گیا تھا۔