وشو گرو جی چپ کیوں ہیں، کچھ تو بولیے نا!... سہیل انجم

ابھی چند روز قبل ایک کارٹون نظر سے گزرا۔ سابق وزیر اعظم ڈاکٹر منموہن سنگھ اور موجودہ وزیر اعظم نریندر مودی ایک دوسرے کے آمنے سامنے ہیں۔ درمیان میں سینے تک ایک دیوار حائل ہے۔ مودی کے ہونٹوں پر گوتم اڈانی کا ٹیپ چپکا ہوا ہے۔ وہ خاموش ہیں۔ منموہن سنگھ ان کو چھیڑ رہے ہیں۔ وہ کہتے ہیں کہ اتنا سب کچھ ہو گیا کب بولو گے۔ میں تو اتنا چپ نہیں رہتا تھا۔ لیکن مودی کے ہونٹوں پر چپکا اڈانی کا ٹیپ ان کو بولنے نہیں دے رہا۔ قارئین کو یاد ہوگا کہ یو پی اے حکومت کے دوران بی جے پی والے ڈاکٹر منموہن سنگھ کو مونی بابا کہہ کر ان کا مذاق اڑانے کی کوشش کرتے تھے۔ جب نریندرمودی وزیر اعظم بنے تو کہا جانے لگا کہ اب ایک بولنے والا وزیر اعظم آیا ہے۔ لیکن دوستو ایسے بولنے سے کیا فائدہ جو بے مطلب ہو، جس کا کوئی نتیجہ نہ نکلے، جس سے سوالوں کے جواب نہ ملیں۔

اس میں کوئی شک نہیں کہ مودی جی بولتے بہت ہیں۔ اور یہ ایک قاعدہ کلیہ ہے کہ جو بہت زیادہ بولتا ہے وہ بہت کچھ لایعنی اور بے مطلب بولتا ہے۔ ان کی گفتگو میں ضروری باتوں کی گنجائش کم اور غیر ضروری باتیں زیادہ ہوتی ہیں۔ جب سینئر کانگریس رہنما راہل گاندھی نے پارلیمنٹ میں اڈانی سے متعلق بہت سارے سوالات کیے اور وزیر اعظم سے ان کے جواب مانگے گئے تو یہ سمجھا جا رہا تھا کہ وہ کچھ تو جواب دیں گے۔ لیکن انھوں نے تین گھنٹے کی دو تقریروں میں اس مسئلے کو چھوا تک نہیں۔ حالانکہ اس درمیان ایسے متعدد امور سامنے آئے ہیں جن پر ان کو بولنا اور جواب دینا چاہیے۔

اس سے پہلے بین الاقوامی اداروں نے کیا کہا اس کو جانے دیں، حالیہ دنوں میں ایسے کئی معاملات سامنے آئے ہیں جو جواب کے متقاضی ہیں۔ ان میں سے کم از کم تین معاملے بہت اہم ہیں۔ ایک گوتم اڈانی کا معاملہ، دوسرا بی بی سی کی دستاویزی فلم اور اس کے دفاتر پر چھاپے کا معاملہ اور تیسرا ایک بین الاقوامی سرمایہ کار جارج سوروس کے انکشافات کا معاملہ۔ قابل ذکر بات یہ ہے کہ یہ تینوں معاملے باہری دنیا کے لوگوں نے اٹھائے ہیں۔ گوتم اڈانی کے فراڈ کا انکشاف ایک امریکی فرم ہنڈن برگ نے کیا تو گجرات فسادات کے حوالے سے برطانوی نشریاتی ادارے بی بی سی نے ایک دستاویزی فلم بنا کر وزیر اعظم مودی کو کٹہرے میں کھڑا کر دیا۔ اس کے بعد جارج سوروس نے یہ بیان دے کر کہ اڈانی کے معاملے میں مودی کو دنیا اور پارلیمنٹ کو جواب دینا چاہیے، سرکاری حلقوں میں ہلچل مچا دی ہے۔

جمعرات کو جرمنی میں میونخ سیکورٹی کانفرنس میں آمریت اور موسمیاتی تبدیلی کے بارے میں بولتے ہوئے سوروس نے اڈانی بحران پر بھی اظہار خیال کیا اور کہا کہ وزیر اعظم نریندر مودی کو غیر ملکی سرمایہ کاروں کے سوالات کے جوابات دینے ہوں گے۔ ان کے بقول مودی اور بزنس ٹائیکون اڈانی قریبی دوست ہیں۔ ان کی قسمت آپس میں جڑی ہوئی ہے۔ اڈانی انٹرپرائزز نے اسٹاک مارکیٹ میں فنڈ اکٹھا کرنے کی کوشش کی لیکن ناکام رہا۔ اڈانی پر اسٹاک میں ہیرا پھیری کا الزام ہے اور ان کا اسٹاک تاش کے پتوں کی مانند زمین بوس ہو گیا ہے۔ مودی اس موضوع پر خاموش ہیں لیکن انہیں غیر ملکی سرمایہ کاروں اور پارلیمنٹ میں سوالات کا جواب دینا پڑے گا۔ انھوں نے مزید کہا کہ اڈانی معاملے سے ہندوستان کی وفاقی حکومت پر مودی کی گرفت نمایاں طور پر کمزور ہو جائے گی اور جمہوری اصلاحات کے لیے دروازے کھل جائیں گے۔ یہ میری سادہ لوحی ہو سکتی ہے لیکن میں ہندوستان میں جمہوریت کی بحالی کی توقع کرتا ہوں۔

قارئین کی اطلاع کے لیے عرض ہے کہ جارج سوروس ایک ہنگری نژاد امریکی تاجر، سرمایہ کار اور مخیر شخص ہیں۔ وہ فلاحی ادارے چلاتے ہیں۔ انھوں نے برطانیہ میں ایک انکشاف کرکے بینک آف انگلینڈ کو کافی نقصان پہنچایا اور برطانوی پاؤنڈ کے خلاف شرط لگا کر صرف ایک ماہ میں ڈیڑھ ارب ڈالر کمائے تھے۔ پچھلے کچھ سالوں میں انہوں نے وزیر اعظم نریندر مودی کی حکومت کے تحت ہندوستان میں آمریت کے عروج اور جمہوری اداروں کے کمزور ہونے پر بھی تشویش کا اظہار کیا ہے۔ 2020 میں داؤس میں انہوں نے کہا تھا کہ ہندوستان کو سب سے بڑا اور بدترین دھچکا لگا ہے جہاں جمہوری طور پر منتخب نریندر مودی ایک ہندو قوم پرست ریاست بنا رہے ہیں۔

مودی حکومت نے جہاں بی بی سی کی دستاویزی فلم میں لگائے گئے الزامات کا کوئی جواب نہیں دیا، البتہ بعد میں دہلی اور ممبئی میں اس کے دفاتر میں سروے کیا اور اڈانی معاملے پر چپ رہنا بہتر سمجھا وہیں انہون نے جارج سوروس کے بیان پر جارحانہ جوابی بیان دینا ضروری سمجھا۔ لیکن سوروس کو جواب دینے کے لیے اسمرتی ایرانی کو اتارا گیا جو سوالوں کے جواب دینے کے بجائے یہ کہہ کر نکل گئیں کہ یہ ہندوستان اور مودی حکومت کو کمزور کرنے کی بین الاقوامی سازش ہے اور پوری ہندوستانی قوم کو اس کا منہ توڑ جواب دینا چاہیے۔

اس حکومت نے ایک وطیرہ بنا لیا ہے کہ جب بھی کسی دوسرے ملک سے ہندوستان کے بارے میں کوئی ایسا بیان آئے جس سے حکومت کو پریشانی ہو تو اسے بین الاقوامی سازش قرار دے دیا جائے اور یہ بھی کہا جائے کہ یہ ہمارا اندرونی معاملہ ہے۔ اس میں کسی دوسرے ملک کو مداخلت کرنے کی ضرورت نہیں ہے۔ جب مسلمانوں اور دیگر اقلیتوں کے انسانی حقوق کی پامالی کی مخالفت میں کوئی بیان آتا ہے تو فوراً اسے ہندوستان کے اندرونی معامالات میں مداخلت قرار دے کر مسترد کر دیا جاتا ہے۔ لیکن جب اڈانی کا معاملہ سامنے آیا تو حکومت اسے بین الاقوامی سازش قرار دے کر مسترد کرنے کی ہمت نہیں کر سکی۔ کیونکہ اڈانی گروپ نے دنیا کے کئی ملکوں میں فرضی کمپنیاں بنا کر ہنڈن برگ کے مطابق فراڈ کرکے اربوں ڈالر کمائے ہیں۔ البتہ اڈانی گروپ کی جانب سے جو جواب دیا گیا اس میں ہنڈن برگ کی رپورٹ کو ہندوستانی قومیت پر حملہ قرار دیا گیا۔

جب بی بی سی نے دستاویزی فلم جاری کی تو حکومت اس کو بھی اندرونی معاملے میں مداخلت قرار دے کر مسترد کرنے کی جرات نہیں کر سکی۔ البتہ اس نے اپنی کھسیاہٹ مٹانے کے لیے اس کے دفاتر پر سروے کا کام شروع کر دیا۔ ایسی کارروائی کو عام زبان میں چھاپہ کہا جاتا ہے لیکن سرکاری اصطلاح میں سروے کہا جاتا ہے۔ مبصرین کا خیال ہے کہ یہ ایک انتقامی کارروائی ہے تاکہ اس کو خاموش کیا جا سکے۔ لیکن بی بی سی نے کہا ہے کہ وہ بلا خوف و تردد اور بغیر کسی تعصب کے اپنا کام کرتا رہے گا۔

اب جارج سوروس کے معاملے میں بھی حکومت نے اسے بین الاقوامی سازش قرار دیا ہے۔ حالانکہ اس سے قبل انھوں نے دیگر کئی ملکوں کے بارے میں بھی سنسنی خیز الزامات لگائے تھے لیکن کسی بھی حکومت نے اس طرح ردعمل ظاہر کرنے کی ضرورت محسوس نہیں کی۔ لیکن مودی حکومت نے اس پر فوری ردعمل ظاہر کیا۔ مبصرین کا خیال ہے کہ اس سے اندازہ لگایا جا سکتا ہے کہ یہ حکومت جو خود کو بہت طاقتور ہونے کا دعویٰ کرتی ہے اندر سے کتنی خوف زدہ ہے۔ اس حکومت نے ہندوستان کو وشو گرو ہونے کا دعویٰ کیا ہے۔ دراصل وہ درپردہ نریند رمودی کو وشو گرو ہونے کا دعویٰ کر رہی ہے۔ لیکن اس وشو گرو میں اتنی اخلاقی جرات نہیں ہے کہ وہ راہل گاندھی کے سوالوں کے جواب دیں۔ یا ہنڈن برگ کے سوالوں کے جواب دیں یا پھر جارج سوروس کے سوالوں کے جواب دیں۔

آج دنیا اس وشو گرو سے سوال کر رہی ہے اور کچھ پوچھ رہی ہے۔ لیکن وشو گرو کے ہونٹوں پر ٹیپ چپکا ہوا ہے۔ وہ کچھ بولنے کی پوزیشن میں نہیں ہیں۔ وہ لوگ جو ڈاکٹر منموہن سنگھ کو مونی بابا کہا کرتے تھے مودی کے مون برت پر چپ ہیں۔ ان سے یہ نہیں کہہ پا رہے ہیں کہ دنیا میں اتنا ہنگامہ برپا ہے۔ خدا را کچھ تو بولیے۔