جی ایس ٹی جب مجھے ہی سمجھ نہیں آ رہا تولوگ کیا سمجھیں گے: بی جے پی وزیر

مدھیہ پردیش میں بی جے پی کی قیادت والی حکومت کے وزیر اوم پرکاش دھُروے جی ایس ٹی کے حوالے سے حق بیانی کر کے اپنی ہی پارٹی کے لئے سبکی کا باعث بن گئے ہیں ۔

جی ایس ٹی کے حوالے سے بی جے پی اور مودی حکومت کے وزراء اپنے منہ میاں مٹھو بنے پھرتے ہیں لیکن مدھیہ پردیش کی شیوراج سنگھ چوہان حکومت کےخوراک و رسد کے وزیراوم پرکاش دھروے پارٹی کے خلاف بول کر پارٹی کی کرکری کرا دی ہے۔ دھر وے نے کہا کہ انہیں خود جی ایس ٹی سمجھ میں نہیں آ رہا ہے۔ 8 نومبر کو نوٹ بندی کی برسی پر منعقدہ پارٹی کے ایک اجلاس کے دوران دھروے نے کہا’’ جی ایس ٹی جب میں خود نہیں سمجھ پا رہا ہوں تو اس تعلق سے میں کچھ نہیں بولوں گا۔‘‘انہوں نے مزید کہا ’’ بڑے بڑے سی اے نہیں سمجھ پا رہے ہیں، بیوپاری نہیں سمجھ پا رہےہیں۔‘‘

شیوراج سنگھ کے اس وزیر کا بیان سوشل میڈیا پر وائرل ہو رہا ہے۔ حالانکہ وزیر نے اپنی تقریر میں یہ بھی کہا کہ اگر آپ سوچیں گے کہ ہمارے ہزار یا 5 ہزار روپے چلے گئے تو ایسا نہیں ہے ، اس کا نتیجہ بعد میں دکھائی دے گا۔ ابھی تھوڑی پریشانی ہو رہی ہے لیکن یہ سمجھ سمجھ کا کھیل ہے دھیرے دھیرے سمجھ جائیں گے تو سکون ملے گا اور اچھا لگے گا۔ ‘‘