کورونا سے لڑنے کے لیے مرکزی حکومت نے سبھی ریاستوں کو دیا ’فائیو فولڈ اسٹریٹجی‘ اختیار کرنے کا مشورہ

ہندوستان میں ایک بار پھر کورونا کی رفتار تیز ہوتی ہوئی دکھائی دے رہی ہے۔ حالات خراب ہونے سے پہلے ہی مرکزی اور ریاستی حکومتیں احتیاطی اقدامات کر رہی ہیں۔ 22 مارچ کو وزیر اعظم نریندر مودی نے کورونا معاملے پر اعلیٰ سطحی میٹنگ بھی کی تھی۔ اب مرکزی وزارت صحت نے کورونا کو لے کر سبھی ریاستوں کو اہم مشورہ دیا ہے۔ وزارت نے کہا ہے کہ ریاستیں ’فائیو فولڈ اسٹریٹجی‘ اختیار کریں، یعنی ’ٹیسٹ، ٹریک، ٹریٹ، ویکسنیشن اور کووڈ رویہ‘ کو لازمی بنائیں۔

مرکزی وزارت صحت نے اس تعلق سے ایک نوٹیفکیشن جاری کیا ہے جس میں کہا گیا ہے کہ ’’ہم کووڈ-19 کی تیاریوں کو دیکھنے کے لیے مزید ایک ماک ڈرل کریں گے۔ سبھی ریاستوں، مرکز کے زیر انتظام خطوں میں جلد ہی ماک ڈرل کی جائے گی۔‘‘ نوٹیفکیشن کے مطابق ملک میں ٹیکوں کی مجموعی طور پر 220.65 کروڑ سے زیادہ خوراکیں دی جا چکی ہیں۔ اسپتال میں بھرتی ہونے میں اضافہ کا کوئی ثبوت نہیں ملا ہے، لیکن احتیاطاً خوراک بڑھائی جانی چاہیے۔

نوٹیفکیشن میں یہ بھی جانکاری دی گئی ہے کہ سبھی سنگین سانس کی بیماری کے معاملوں کی پریکٹیکل روم نگرانی اور ٹیسٹنگ کو بڑھانے کی ضرورت ہے۔ وزارت نے ریاستوں سے طبی سہولیات میں انفلوئنزا اور کووڈ-19 کے لیے ضروری دواؤں و رسد کی دستیابی یقینی کرنے کے لیے بھی کہا ہے۔ علاوہ ازیں ریاستوں کو اسپتالوں میں مناسب مقررہ بستر اور طبی اہلکاروں کی دستیابی یقینی کرنے کے لیے کہا گیا ہے۔