پی این بی مہاگھوٹالہ: نئی ایف آئی آر میں بی جے پی کا جھوٹ پکڑا گیا

پنجاب نیشنل بینک (پی این بی) گھوٹالہ میں ہر روز نئے انکشافات ہو رہے ہیں۔ پی این بی کی نئی شکایت پر سی بی آئی نے جو دوسری ایف آئی آر داخل کی ہے اس میں یہ کہا گیا ہے کہ گھوٹالے کے اہم ملزم میہل چوکسی اور نیرو مودی نے اپنی تین کمپنیوں کے ذریعہ پنجاب نیشنل بینک سے تقریباً 4886 کروڑ روپے حاصل کیے۔ بینک سے اس پوری رقم کو لینے میں 143 ’ایل او یو‘ یعنی لیٹر آف انڈرٹیکنگ کا استعمال کیا گیا اور یہ سبھی ’ایل او یو‘ 2017 میں جاری کیے گئے تھے۔ اس انکشاف کے بعد بی جے پی کے اس جھوٹ کا بھی پردہ فاش ہو گیا ہے جس میں انھوں نے کہا تھا کہ یہ گھوٹالہ 2011 سے چل رہا تھا۔

اس کیس کی پہلی ایف آئی آر میں 8 ’ایل او یو‘ کے ذریعہ 280.7 کروڑ روپے کے گھوٹالے کی بات کہی گئی تھی۔ اب سی بی آئی نے پی این بی سے ملی نئی جانکاری کی بنیاد پر پرانی ایف آئی آر میں کئی باتیں جوڑی ہیں۔

دوسری طرف سینئر کانگریس لیڈر اور وکیل کپل سبل نے پی این بی گھوٹالے سے متعلق وزیر اعظم نریندر مودی پر طنز کیا ہے۔ انھوں نے وزیر اعظم کے پرانے بیان کا حوالہ دیتے ہوئے کہا ’’ہمارے ملک کے چوکیدار پکوڑے بنانے کی صلاح دے رہے ہیں، آج کے حالات یہ ہیں کہ چوکیدار سو رہا ہے اور چور بھاگ گیا ہے۔‘‘

کپل سبل نے وزیر اعظم نریندر مودی اور وزیر مالیات ارون جیٹلی پر براہ راست اس گھوٹالے میں شامل ہونے کا الزام بھی عائد کیا۔ انھوں نے کہا کہ ان اشخاص نے ’کرونی کیپٹلزم‘ کو تنظیمی شکل دے دی ہے۔ انھوں نے یہ بھی کہا کہ دھوکہ دہی کرنے والوں کو فائدہ پہنچانے کے لیے کریڈٹ کی حد بڑھا دی گئی۔ کپل سبل نے مودی حکومت پر براہ راست یہ الزام بھی عائد کیا کہ اس کو ان سب باتوں کی خبر تھی اور وہ جان رہے تھے کہ ملک کو لوٹا جا رہا ہے پھر بھی انھوں نے اپنی آنکھیں موند رکھی تھیں۔

کپل سبل نے بی جے پی کے اس بیان کو بھی ورغلانے والا بتایا جس میں اس نے کہا تھا کہ یہ گھوٹالہ 2011 سے چل رہا تھا۔ سبل نے سی بی آئی کی ایف آئی آر کا حوالہ دیتے ہوئے کہا کہ قرض کے لیے سارے ’ایل او یو‘ 17-2016 میں جاری کیے گئے تھے۔

گزشتہ دنوں وزیر اعظم دفتر نے نریندر مودی کے بیرون ملکی سفر سے متعلق جانکاری دینے سے منع کر دیا تھا، اس سلسلے میں کپل سبل نے حملہ آور رخ اختیار کرتے ہوئے کہا کہ وزیر اعظم مودی کو یہ بات بتانے میں کیا ڈر لگ رہا ہے کہ ان کے بیرون ملکی سفر پر ان کے ساتھ کون کون لوگ گئے تھے۔