لون موریٹوریم: کریڈٹ کارڈ ہولڈرز کو سود میں رعایت کیوں دی گئی! سپریم کورٹ

نئی دہلی: سپریم کورٹ نے لون موریٹوریم معاملہ میں جمعرات کے روز سماعت کرتے ہوئے کہا کہ کریڈٹ کارڈ ہولڈرز کو سود پر سود میں رعایت کا فائدہ نہیں دیا جانا چاہیے۔ عدالت نے کہا کہ کریڈٹ کارڈ والے قرضدار نہیں ہیں، وہ خریداری کرتے ہیں، نہ کوئی قرض لیتے ہیں۔

وہیں حکومت نے سپریم کورٹ سے گہار لگائی کہ آگے اور کسی راحت کی مانگ پر غور نہ کیا جائے، کیونکہ حکومت پہلے ہی زیادہ سے زیادہ رعایت فراہم کر چکی ہے۔ سالیسٹر جنرل تشار مہتا نے کہا کہ حکومت بحران سے دو چار علاقوں کو سہارا دینے کے لئے ہر ممکن مدد فراہم کرنے کے لئے تیار ہے۔

سپریم کورٹ نے لون موریٹوریم معاملہ میں سود پر سود معاف کرنے کے حوالہ سے اہم سماعت کی۔ معاملہ کی سماعت کے دوران سالیسٹر جنرل تشار مہتا نے مرکز کے 9 نومبر کے حلف نامہ کے بارے میں معلومات دی۔ جسٹس اشوک بھوشن، آر سبھاش ریڈی اور ایم آر شاہ کی بنچ چھ مہینے کی لون موریٹوریم (قرض کی ادائیگی میں وقت کی رعایت) سے متعلق عرضٰ پر سماعت کر رہی ہے۔ مرکز نے مارچ میں اگست 2020 کے بیچ گاہکوں کو لون موریٹوریم کی سہولت پہلے ہی دی تھی۔

اس مدت کے سود پر لگنے والے سود کو معاف کرنے کی ہدایت پہلے ہی دے چکی ہے، جس پر مرکزی حکومت نے بھی رضامندی ظاہر کی۔ عدالت عظمیٰ نے اس سے پہلے کہا تھا کہ حکومت کو جلد از جلد سود معافی کے منصوبہ کو نافذ کرنا چاہیے۔ عدالت نے کہا تھا کہ لوگوں کی دیوالی اس بار حکومت کے ہاتھوں میں ہے۔