اپنے خلاف درخواست پر فوری سماعت کے لئے انڈیا بلس کی اپیل

نئی دہلی: انڈيا بلس ہاؤسنگ فنانس لمیٹڈ (آئی بی ایچ ایف ایل) نے اپنے خلاف پبلک فنڈز کے غلط استعمال کا الزام لگانے والی ایک درخواست پر فوری سماعت کے لئے عدالت عظمیٰ سے اپیل کی ہے۔ آئی بی ایچ ایف ایل نے ایک دودھ بیچنے والے کی جانب سے دائر درخواست کو اوچھی حرکت قرار دیتے ہوئے کہا کہ اس نے کمپنی کو کافی نقصان پہنچایا ہے۔

آئی بی ایچ ایف ایل کی جانب سے سینئر وکیل ابھیشیک منو سنگھوی نے جسٹس اندرا بنرجی کی صدارت والی تعطیلی بنچ کے سامنے معاملہ کا خاص طور سے ذکر کیا اور فوری سماعت کی بھی درخواست کی۔ سماعت کے دوران سنگھوی نے بنچ سے کہا کہ درخواست میں کمپنی کے خلاف بے بنیاد الزامات لگائے گئے ہیں اور اسے میڈیا میں لیک کیا جا رہا ہے۔

انہوں نے دلیل دی کہ میڈیا رپورٹس کی وجہ سے آئی بی ایچ ایف ایل کے حصص کو نقصان اٹھانا پڑ رہا ہے جس سے عدالت کو متعلقہ درخواست کی فوری سماعت کرنی چاہیے۔ عدالت نے کہا کہ وہ آئی بی ایچ ایف ایل کے خلاف دائر درخواست کو لسٹیڈ کرنے پر جلد فیصلہ لے گا۔

اس سے پہلےآئی بی ایچ ایف ایل نے گزشتہ پیر کو عدالت میں کمپنی کے خلاف 98000 کروڑ روپے کی ہیرا پھیری کے الزام میں دائر درخواست کو اس کی شبیہ خراب کرنے اور لکشمی ولاس بینک کے ساتھ اس کے انضمام میں اڑنگا ڈالنے کی چال قرار دیا۔ کمپنی نے کہا کہ دودھ بیچنے والے ابھے یادو نے کمپنی کے صرف چار شیئر خریدے ہیں اور ان کی جانب سے دائر پٹیشن سے کمپنی کی شبیہ خراب کرنے کی ایک بد بختانہ کوشش ہے۔