معاشی بحران میں ہیرا کاروباری بھی بے حال، گجرات میں ہزاروں ملازمتیں ختم

ملک کی معیشت پر چھائے بحران کا اثر گجرات کی ہیرا منڈی تک پہنچ گیا ہے۔ گزشتہ کچھ مہینوں کے دوران یہاں کی 40 فیصد فیکٹریوں میں کام ٹھپ ہو گیا ہے۔ اس وجہ سے ہیرا کاروبار سے جڑے تقریباً 60 ہزار لوگوں کی ملازمتیں چلی گئی ہیں۔ اس کے پیچھے سال 2016 میں نافذ نوٹ بندی اور پھر اس کے بعد آئی جی ایس ٹی کو مانا جاتا ہے۔

گجرات کے سورت کو ہیرا کاروبار کا سب سے بڑا ہَب مانا جاتا ہے۔ کاروباریوں کے مطابق نومبر 2016 میں نوٹ بندی کے بعد سے ہی حالات کافی مشکل ہو گئے تھے۔ پھر اس کے بعد جولائی 2017 میں جی ایس ٹی اور کچھ ہی مہینے بعد فروری 2018 میں نیرو مودی، میہل چوکسی کے بینک گھوٹالوں نے اس کاروبار کی کمر توڑ دی۔ گجرات کے ہی امریلی اور بھاؤ نگر میں بھی بڑے پیمانے پر ہیرے کی کٹنگ اور پالیشنگ ک اکام ہوتا ہے، لیکن وہاں بھی کاروبار میں سستی ہے۔

ہیرا کاروبار میں اس بحران کی ایک اور بڑی وجہ ہے کہ گزشتہ کچھ دنوں سے پوری دنیا میں ہندوستانی ہیرے کی طلب کم ہوتی جا رہی ہے۔ رپورٹ کے مطابق ہندوستانی ہیروں کی چین میں طلب 20 فیصد کم ہوئی ہے۔ جب کہ خلیج ممالک، یورپ اور امریکہ میں بھی طلب کم ہوئی ہے۔ گزشتہ سال کے مقابلے رواں مالی سال کے شروعاتی چار مہینوں میں ملک کے ہیرا کاروبار میں 15.11 فیصد کی گراوٹ دیکھنے کو ملی ہے۔ اس کے ساتھ ہی جولائی میں کَٹ پالش ہیرے کی برآمدگی 18.15 فیصد کم ہو گئی ہے۔

اعداد و شمار کے مطابق اس سال جولائی میں صرف 18633.10 کروڑ روپے کے ہیرے کی برآمدگی ہوئی، جو کہ گزشتہ سال کے مقابلے 11.08 فیصد کم ہے۔ گزشتہ سال اسی مہینے 84272.30 کروڑ روپے کی برآمدگی ہوئی تھی۔ ایسا تب ہے جب ہندوستان دنیا میں رَف ڈائمنڈ کی کٹنگ اور پالشنگ کا سب سے بڑا مرکز ہے۔ دنیا کے 15 میں سے 14 رَف ڈائمنڈ کی پالش یہیں ہوتی ہے۔

غور طلب ہے کہ ہیرے کے کاروبار سے تنہا گجرات میں 20 لاکھ لوگ جڑے ہیں، جس میں سے تقریباً 8 لاکھ لوگ ہیرے کی کٹنگ اور پالیشنگ کے کام میں لگے ہیں۔ معاشی بحران کے برے دور سے گزر رہی کئی کمپنیاں آج کل صرف ایک شفٹ میں کام کرا رہی ہیں۔ جب کہ عام طور پر ان کمپنیوں میں تین شفٹوں میں کام ہوتا تھا۔ اس دوران ہیرے کی قیمت میں بھی 6 سے 10 فیصد کی کمی ہوئی ہے۔