انیل امبانی کے بیٹے پر سیبی نے عائد کیا ایک کروڑ کا جرمانہ، ضوابط کی خلاف ورزی کا الزام

سیکوریٹی اینڈ ایکسچینج بورڈ آف انڈیا (سیبی) نے مکیش امبانی کے چھوٹے بھائی انل امبانی کے بیٹے انمول پر 1 کروڑ روپے کا جرمانہ لگایا ہے۔ ان پر ریلائنس ہوم فائنانس کو قرض دینے کے معاملے میں ضابطوں پر عمل نہیں کرنے کا الزام ہے۔ انمول امبانی پر یہ جرمانہ ریلائنس ہوم فائنانس معاملے میں عائد کیا گیا ہے۔ سیبی نے کہا ہے کہ کارپوریٹ قرض کو منظوری دیتے وقت مناسب جانچ نہیں کی گئی۔ اس وجہ سے یہ جرمانہ لگایا گیا ہے۔ انمول کے ساتھ ہی ریلائنس ہوم فائنانس کے چیف رِسک آفیسر گوپال کرشنن پر بھی 15 لاکھ روپے کا جرمانہ عائد ہوا ہے۔

سیبی کا کہنا ہے کہ ریلائنس ہوم فائنانس بورڈ میں کام کرنے والے انمول امبانی نے کمپنی کے بورڈ سے ایسے لون اپروولس کو روکنے کی واضح ہدایت کے باوجود کارپوریٹ قرض کو منظوری دی، مارکیٹ ریگولیٹر کے مطابق جانچ میں پتہ چلا ہے کہ 14 فروری 2019 کو انمول امبانی نے ایکورا پروڈکشنس پرائیویٹ لمیٹڈ کو 20 کروڑ روپے کا قرض منظور کیا تھا۔

خاص بات یہ ہے کہ انمول امبانی کے ذریعہ یہ قرض ایسے وقت منظور کیا گیا جبکہ تین دن قبل ہی یعنی 11 فروری 2019 کو ریلائنس ہوم فائنانس کے بورڈ نے اپنی میٹنگ میں مینجمنٹ کو کوئی بھی 'جی پی سی ایل لون' جاری نہیں کرنے کی ہدایت دی تھی۔ رپورٹ کے مطابق سیبی کے آفیشیل نوٹس میں کہا گیا ہے کہ انل امبانی کے بیٹے اور کرشنن گوپال کرشنن دونوں کو 45 دنوں کے اندر اپنے اپنے جرمانے کی ادائیگی کرنے کا حکم دیا گیا ہے۔

انمول امبانی پر جرمانے کی خبر کا اثر منگل کو ریلائنس ہوم فائنانس کے شیئر پر بھی دیکھنے کو مل سکتا ہے۔ ریلائنس ہوم فائنانس شیئر گزشتہ کچھ دنوں سے زبردست تیزی کے ساتھ بھاگ رہا ہے۔ پیر کو انل امبانی کے اس اسٹاک میں شیئر مارکیٹ میں کاروبار شروع ہوتے ہی تیزی دیکھی گئی اور یہ 4.79 فیصد کی اُچھال کے ساتھ 4.59 روپے پر کاروبار کر رہا تھا۔