پوجا بھٹ، راہل گاندھی کی بھارت جوڑو یاترا میں ہوئیں شامل

حیدرآباد: فلم اداکارہ پوجا بھٹ، راہل گاندھی کی بھارت جوڑویاترا میں شامل ہوئیں اور ان کے ساتھ کچھ فاصلہ طے کیا۔ پوجابھٹ، بالی ووڈ سے تعلق رکھنے والی پہلی شخصیت ہیں جنہوں نے اس یاترا میں حصہ لیا اور راہل گاندھی کے ساتھ کچھ فاصلہ طے کیا۔ اس فاصلہ کے دوران انہوں نے راہل گاندھی سے تبادلہ خیال بھی کیا۔ عوام نے اداکارہ کا استقبال کیا۔ اداکار، ہدایت کار اور پروڈیوسر پوجابھٹ، سوشل میڈیا پر مختلف مسائل پر کھل کر اظہارخیال کرتی ہیں۔ انہوں نے 1989میں بنی فلم ڈیڈی سے اپنی اداکاری کی شروعات کی تھی۔ انہوں نے کئی فلموں جیسے زخم، دل ہے کہ مانتا نہیں، سر اور دیگر فلموں میں اپنی اداکاری کے جوہر دکھائے ہیں اور بعد ازں انہوں نے پروڈکشن اور ہدایت کاری کے میدان میں قدم جمایا ہے۔

 واضح ہو کہ کانگریس لیڈر راہل گاندھی کی بھار ت جوڑو یاترا تلنگانہ میں 8ویں دن میں داخل ہوگئی ہے جس پر کافی بہترعوامی ردعمل دیکھا جا رہا ہے۔ جگہ جگہ راہل گاندھی عوام اور مختلف طبقات سے ملاقات کرتے ہوئے ان کے مسائل سے واقفیت حاصل کر رہے ہیں۔ ہجوم کی جانب سے ان کا شانداراستقبال کیا جا رہا ہے۔ کئی مقامات پر کانگریس کے لیڈروں کے ساتھ ساتھ دیگر شعبہ جات کی اہم شخصیات تاجر برادری ان سے ملاقات کرتے ہوئے کچھ دور فاصلہ تک اس یاترا کا حصہ بن رہی ہیں۔

کانگریس کے لیڈروں کی جانب سے جگہ جگہ خیرمقدمی اسٹیج بنا کر ان کا استقبال کیا جا رہا ہے۔ اس یاترا کے سلسلہ میں تلنگانہ کانگریس کے لیڈران سرگرم ہیں۔ یہ یاترا تلنگانہ میں 19 اسمبلی اور7 پارلیمانی حلقوں کا احاطہ کرے گی اور7 نومبر کو مہاراشٹرمیں داخل ہونے سے پہلے اس تلگو ریاست میں 375 کلومیٹر سفر مکمل کرے گی۔ 4 نومبر کو یاترا میں ایک دن کا وقفہ دیا جائے گا۔