ماسک ٹی وی کا نئے سال پر تحفہ، فلم’بلال‘ کی فری اسٹریمنگ

نئے سال کے موقع پر او ٹی ٹی پلیٹ فارم ماسک ٹی وی کی طرف سے ناظرین کو نیا تحفہ پیش کیا جا رہا ہے۔ ماسک ٹی وی نے ناظرین سے محبت کاتحفہ دیتے ہوئے انھیں ایک ہفتے کے لیے فلم ’بلال‘ کی مفت اسٹریمنگ کا فیصلہ کیا ہے اس سلسلے میں اظہار خیال کرتے ہوئے ماسک ٹی وی او ٹی ٹی پلیٹ فارم کی تخلیقی ہدایت کار مانسی بھٹ نے کہا کہ بلال دراصل ایک جدوجہد کرنے والے بچے کی کہانی ہے، جسے بچپن میں کافی چیلنجوں کا سامنا کرنا پڑا۔ بچپن میں اسے اپنی چھوٹی بہن کے ساتھ گھر سے نکال دیا گیا تھا۔ بعد میں وہی بلال اپنی جدوجہد سے اپنا کھویا ہوا وقار واپس لے لیتا ہے۔

انہوں نے بتایا کہ  بلال ایک اینی میشن فلم ہے، جو سچے واقعات پر مبنی ہے۔ ہمیں امید ہے کہ اس بلال کو ناظرین کی طرف سے وہی پیار ملے گا جیسا کہ پچھلے تمام منصوبوں کو ملا تھا۔ ماسک ٹی وی او ٹی ٹی پلیٹ فارم رواں ماہ ایک سال کا ہو گیا ہے اور گزشتہ ایک سال میں ہی اس پلیٹ فارم نے ناظرین میں اپنا ایک اچھا نام بنایا ہے۔ مانسی بھٹ نے مزیدکہا کہ ہم نے کرکٹ ورلڈ کپ کے دوران اس پلیٹ فارم پر فلم بھی ریلیز کی تھی، جسے ناظرین نے بہت پسند کیا تھا۔ اس سے صاف ظاہر ہوتا ہے کہ اگر آپ کا مواداچھا ہے تو ناظرین اسے ضروردیکھیں گے۔

خیال رہے کہ ماسک ٹی وی او ٹی ٹی نے بہت کم وقت میں اچھی خاصی ٹی آر پی حاصل کرتے ہوئے گزشتہ ماہ اپیل اسٹور پر 4.8 ریٹنگ حاصل کر کے نمبر 1او ٹی ٹی پلیٹ فارم ہونے کا اعزاز حاصل کرلیا۔ اس پلیٹ فارم کی خوبی یہ ہے کہ یہاں ہر طبقے کے ناظرین کے لیے فلمیں اور ویب سیریز دستیاب ہیں۔ ماسک ٹی وی او ٹی ٹی نے آج کے مسابقتی دور میں ہر طبقے کی توقعات پر پورا اترنے والی نئی فلمیں نشر کرکے اپنا دبدبہ برقرار رکھا ہے۔