متھن چکرورتی کی حالت مستحکم، طبی ٹیم کی نگرانی جاری

کولکاتا: بالی ووڈ اداکار اور بی جے پی رہنما متھن چکرورتی کو بے چینی کی شکایت کے بعد ہفتہ کی صبح کولکاتا کے ایک نجی اسپتال میں داخل کرایا گیا تھا۔ آئی اے این ایس نے ذرائع کے حوالہ سے خبر دی ہے کہ ان کی حالت اب مستحکم ہے۔

معروف اداکار کے قریبی ذرائع کے مطابق کولکاتا کے نجی اسپتال میں ان کا علاج کرنے والی ڈاکٹروں کی ٹیم نے بتایا ہے کہ اداکار کی حالت مستحکم ہے۔ انہوں نے کہا کہ متھن نے طبی معائنے کے لیے بنائی گئی ٹیم کے ڈاکٹروں سے بات چیت کی۔

ذرائع نے بتایا کہ ایک ایم آر آئی کرایا گیا ہے جس میں اسکیمک سیریرو ویسکولر بلاکیج کی علامات ظاہر ہوئی ہیں، جس کا سادہ لفظوں میں مطلب ہے تھرومبس یا منجمد خون کے سبب دماغ کی طرف جانے والی شریان کا بند ہونا۔ ذرائع نے بتایا کہ میڈیکل ٹیم میں ایرو میڈیسن کے ماہر، ایک ماہر امراض قلب اور ایک معدے کے ماہر شامل ہیں۔ ذرائع کا کہنا ہے کہ اداکار ہلکی خوراک پر ہیں۔

اس سے قبل متھن کے بیٹے میموہ چکرورتی نے میڈیا کو بتایا تھا کہ ان کے والد کو معمول کے چیک اپ کے لیے اسپتال میں داخل کرایا گیا ہے۔ خیال رہے کہ متھن کولکاتا میں ایک فلم کی شوٹنگ کر رہے تھے، جب ہفتہ کی صبح تقریباً 10 بجے انہیں بے چینی کی شکایت شروع ہوئی، جس کے بعد انہیں ایک نجی اسپتال لے جایا گیا۔