’شہنشاہ جذبات‘ دلیپ کمار کے حضور میں ’کنگ خان‘ کی حاضری

ممبئی: ہندی فلمی دنیا کے موجودہ سپر اسٹار شاہ رُخ خان نے ماضی کے سپر اسٹار شہنشاہ جذبات دلیپ کمار کی ممبئی کے پالی ہل باندرہ میں واقع رہائش گاہ پرعیادت کی۔ دلیپ کمار صحت مند ہیں۔ یہ ملاقات بروز پیردیررات گئے ہوئی۔

واضح رہے کہ شاہ رخ اور دلیپ کمار وسائرہ بانو کے درمیان کافی گہرے تعلقات ہیں اوراکثر وبیشتر وہ بزرگ اداکار کی عیادت کرنے ان کی رہائش گاہ جاتے رہتے ہیں۔ دلیپ کمار کی گزشتہ کئی مہینوں سے طبیت ناساز چل رہی ہے اور وہ کئی بار اسپتال میں بھی داخل ہوچکے ہیں۔

دریں اثنا متعدد فلمی ستارے ان سے ملاقات کے لئے گئے لیکن مصروفیت کی وجہ سے شاہ رخ خان ان کی عیادت کے لئے نہیں جا سکے تھے۔

فی الحال گزشتہ شب انہوں نے دلیپ کمار سے ملاقات کی۔ دلیپ کمار کے خاندان کے قریبی فیصل فاروقی نے سوشل میڈیا پر دونوں کی تصویریں جاری کی ہیں۔ جس میں انہوں نے دلیپ صاحب کو صحتیاب بتایا ہے۔

شاہ رُخ نے اپنے مصروف اوقات کے باوجود ضعیف اداکار کی عیادت کی۔ شاہ رخ فی الحال آنندرائے کی فلم زیرو کی شوٹنگ میں مصروف ہیں جس میں کیٹریناکیف اور انوشکا شرما ان کے مد مقابل ہیں۔

(یو این آئی ان پٹ کے ساتھ)