عرفان خان کے مہلک مرض کی تصدیق،علاج بیرون ملک ہوگا

کچھ دنوں قبل بالی وڈ اداکار عرفان خان نے ٹوئٹر پر یہ معلومات دی تھی کہ وہ ایک مہلک مرض میں مبتلا ہیں۔ اس کے بعد چہار سو قیاس آرائیوں کا دور شروع ہو گیا تھا۔ اس پر ان کی اہلیہ اور فلم انڈسٹری نے افواہ نہ پھیلانے کی اپیل کی تھی۔ اب عرفان خان نے خود اپنے مرض کا انکشاف کر دیا ہے۔

عرفان خان کو گلیو بلاسٹوما ملٹی فروم (جی بی ایم)چوتھے درجے کے کینسر کی نشاندہی ہوئی ہے جو کینسر کی مہلک ترین قسم بتائی جار ہی ہے۔

عرفان خان نے ٹوئٹر پر لکھا ’’ اچانک سے ہوا واقعہ آپ کو مضبوط بناتا ہے، پچھلے کچھ دنوں سے میری زندگی میں ایسا ہی کچھ ہو رہا ہے۔ مجھے نیورو انڈوکرون نامی مرض ہوا ہے۔ لیکن میرے آس پاس موجود لوگوں کی محبت اور طاقت نے مجھ میں امید جگائی ہے۔‘‘

انہوں نے مزید لکھا ’’اس کے علاج کے لئے میں بیرون ملک جا رہا ہوں۔ میری سبھی سے گزارش ہے کہ میرے لئے دعا کرتے رہیں۔ میرے مرض کے لئے جو افواہیں پھیلائیں جا رہی ہیں اس کے لئے واضح کر دوں کہ نیورو ہمیشہ برین کے لئے نہیں ہوتا، تحقیق کرنے کے لئے گوگل سب سے آسان ذریعہ ہے۔ جن لوگوں نے میرے بیان کا انتظار کیا ، سنانے کے لئے میں ان کے لئے اور کہانیاں لے کر آؤنگا ۔ ‘‘

یہ بھی پڑھیں: عرفان خان خطرناک مرض میں مبتلا!

واضح رہے کہ چند روز قبل عرفان خان نے خطرناک مرض میں مبتلا ہونے کی تصدیق خود ایک ٹوئٹ کے ذریعے کی تھی۔ عرفان خان کا کہنا تھا کہ وہ اور ان کے دوست و اہل خانہ خطرناک بیماری کا صحیح پتہ لگانے میں مصروف ہیں اور انہیں جیسے ہی پتہ چلے گا وہ خود ہی مداحوں کو اس سے آگاہ کریں گے۔ ان کا کہنا تھا کہ وہ گزشتہ 15 روز سے طبیعت میں خرابی محسوس کر رہے ہیں اور انہیں ابتدائی طور پر پتہ چلا ہے کہ وہ کسی خطرناک یا موذی مرض میں مبتلا ہیں۔

دوسری جانب عرفان خان کی طبیعت ناساز ہونے کی وجہ سے ان کی آنے والی ایکشن تھرلر فلم ’سپنا دی دی‘ کی شوٹنگ منسوخ کردی گئی ہے۔ فلم میں عرفان خان دوسری مرتبہ دیپکا پڈوکون کے ساتھ ایکشن میں نظر آئیں گے۔