ستیش کوشک کی موت معاملے میں وکاس مالو کی بیوی کو دہلی پولیس نے بھیجا سمن، الزامات پر پوچھ تاچھ کے لیے طلب کیا

اداکار و ہدایت کار ستیش کوشک کی موت معاملے میں اپنے کاروباری شوہر وکاس مالو پر سنگین الزام عائد کرنے والی وینا مالو کو دہلی پولیس نے سمن بھیج کر پوچھ تاچھ میں شامل ہونے کے لیے طلب کیا ہے۔ وینا نے پولیس کو دی اپنی شکایت میں دعویٰ کیا ہے کہ ان کے شوہر نے 15 کروڑ روپے کے لیے کوشک کا سازش کے تحت قتل کیا ہے، جو اس نے کوشک سے دبئی میں سرمایہ کاری کے مقصد سے لیے تھے۔

دہلی پولیس افسران کے مطابق انھیں پیر کے روز پوچھ تاچھ میں شامل ہونے کے لیے طلب کیا گیا تھا، اور اس سلسلے میں اتوار کو ہی جانکاری دی گئی تھی۔ اس درمیان پولیس نے 8 مارچ (ہولی) کے دن بجواسن واقع فارم ہاؤس میں ہوئی پارٹی میں شامل ہوئے 20 لوگوں سے بھی پوچھ تاچھ کی اور ان کے بیان درج کیے۔ اس کے علاوہ پولیس نے فارم ہاؤس کا بھی دورہ کیا اور پارٹی والے دن وہاں موجود اسٹاف سے پوچھ تاچھ کی۔

اس سے قبل ستیش کوشک کی موت کے بعد ان کے دوست اور مالو فارم ہاؤس کے مالک وکاس مالو کی بیوی نے پولیس کو دی شکایت میں دعویٰ کیا تھا کہ 23 اگست 2022 کو کوشک دبئی میں ان کے گھر آئے اور شوہر سے 15 کروڑ روپے کا مطالبہ کیا تھا۔ میں ڈرائنگ روم میں موجود تھی جہاں کوشک اور میرے شوہر بحث میں الجھے ہوئے تھے۔ کوشک کہہ رہے تھے کہ انھیں پیسوں کی سخت ضرورت ہے۔ تین سال ہو گئے جب اس نے میرے شوہر کو سرمایہ کاری کے لیے 15 کروڑ روپے دیئے تھے۔

خاتون نے آگے دعویٰ کیا کہ اس دن کوشک نے یہ بھی کہا کہ نہ تو کوئی سرمایہ کاری کی گئی اور نہ ہی ان کا پیسہ لوٹایا گیا۔ اس کے لیے وہ ٹھگا ہوا محسوس کر رہے تھے۔ خاتون نے دبئی میں ایک پارٹی میں لی گئی کاروباری وکاس مالو اور ستیش کوشک کی ایک تصویر بھی شیئر کی۔ خاتون کا الزام ہے کہ پارٹی میں انڈر ورلڈ ڈان داؤد ابراہیم کا بیٹا بھی موجود تھا۔

خاتون نے یہ بھی کہا کہ میرے شوہر نے کوشک سے وعدہ کیا تھا کہ وہ جلد ہی پیسہ دے دیں گے۔ جب میں نے اپنے شوہر سے پوچھا تو انھوں نے کہا کہ کوشک کے پیسے کو کووڈ وبا کے دوران گنوا دیا۔ میرے شوہر نے بھی کہا کہ وہ کوشک سے چھٹکارا پانے کا منصوبہ بنا رہے ہیں۔ شکایت میں خاتون نے کہا کہ ان کا شوہر نشے کا کاروبار کرتا ہے۔