بالی ووڈ اداکارہ زویا مورانی نے بھی حاصل کی کورونا پر فتح، اسپتال سے ملی چھٹی

کورونا انفیکشن میں مبتلا ہونے کے بعد علاج کرا رہی بالی ووڈ اداکارہ زویا مورانی نے اس وائرس پر فتح حاصل کر لی ہے اور انھیں اسپتال سے چھٹی مل گئی ہے۔ زویا نے اسپتال سے باہر آنے کے بعد یہ جانکاری اپنے انسٹاگرام پر بھی دی۔ اداکارہ نے ایک سرجیکل ماسک پہنے ہوئے سیلفی بھی پوسٹ کی۔ تصویر کے کیپشن میں زویا نے لکھا "وقت آ گیا ہے کہ میں اپنے جنگجوؤں کو گڈ بائے بولوں اور وہ ہمیشہ میری دعاؤں میں بنے رہیں۔ آئسولیشن کے آئی سی یو، الوداع۔ اب پیارے گھر کا وقت ہے۔"

واضح رہے کہ اس سے پہلے ہفتہ کے روز انسٹاگرام لائیو پر بالی ووڈ اداکار ورون دھون کے ساتھ بات چیت کرتے ہوئے زویا نے اپنی صحت کے بارے میں کچھ اہم جانکاریاں اپنے شیدائیوں کو دی تھیں۔ زویا نے اپنی صحت کے بارے میں کافی مثبت تجربہ بیان کیا تھا۔ انھوں نے کہا تھا کہ "میں واقعی میں اس پر یقین نہیں کر سکتی تھی، کیونکہ مجھے اس خبر پر شبہ تھا اور میں سبھی کہانیوں کو دیکھ رہی تھی۔ اور پھر اچانک یہ محسوس ہوا کہ مجھے بھی یہ ہے، یہ تھوڑا خوفناک ہے۔ لیکن میں وعدہ کر سکتی ہوں کہ ایک بار جب آپ اس سے گزرتے ہیں تو آپ کو احساس ہوتا ہے کہ اسے سنبھالا جا سکتا ہے۔"