کورونا کے خطرات میں کمی، سعودی شہریوں کو القطیف میں آمد ورفت کی اجازت

سعودی وزارت داخلہ نے کہا ہے کہ کورونا وبا کے خطرات میں کمی کے بعد آج جمعرات سے القطیف گورنری میں شہریوں کو آمد ورفت کی اجازت دی گئی ہے۔ سعودی عرب کی سرکاری نیوز ایجنسی 'ایس پی اے' نے وزارت داخلہ کے ایک ذمہ دار ذریعے کے حوالے سے بتایا ہے کہ انسداد کورونا کی حکومتی مہم اور وزارت صحت کی طرف سے فراہم کردہ ہدایات کے بعد جمعرات7 رمضان المبارک سے القطیف گورنری میں آمد ورفت کی اجازت دینے کا فیصلہ کیا گیا ہے۔

القطیف میں فیصلے کے تحت شہریوں کو صبح نو بجے سے شام پانچ بجے تک آمد ورفت کی اجازت ہوگی۔ شہریوں کی نقل وحرکت کی اجازت کے ساتھ جن سرگرمیوں کو کورونا کے دوران جاری رکھنے کی ہدایت کی گئی ہے وہ بدستور جاری رہیں گی۔

خیال رہے کہ کورونا وائرس کے خطرے کے پیش نظر سعودی حکومت نے 8 مارچ کو القطیف گورنری میں باہر سے آمد ورفت پرپابندی عائد کردی تھی۔ القطیف سعودی عرب کا پہلا شہر ہے جہاں پر ایران سے لوٹنے والے متعدد افراد میں کورونا کی تصدیق کی گئی تھی۔

ادھر ایک دوسرے سیاق میں سعودی عرب کی وزارت صحت کے ترجمان محمد العبد العالی نے گزشتہ روز ایک پریس کانفرنس میں بتایا کہ گزشتہ 24 گھنٹوں کے دوران مملکت میں کورونا کے مزید 1325 کیسز سامنے ہیں۔

(العربیہ ڈاٹ نیٹ)