سچ کا جادو سر چڑھ کر بولتا ہے: راہل گاندھی

’’ہندوستان میں کانگریس کو مرکزی اقتدار حاصل ہونے کی صورت میں سب سے پہلے جو تین اقدام اٹھائے جائیں گے ان میں سب سے پہلا قدم روزگار پیدا کرنا ہوگا جس کے لیے اسمال اور میڈیم انڈسٹری کو فروغ دینا بہت ضروری ہے۔ دوسرا قدم ایجوکیشن سسٹم کو عالمی سطح کا بنانا ہوگا جو انتہائی اہم ہے۔ ہمارے یہاں کے تعلیمی ادارے بہت اچھے ہیں اور اعلیٰ تعلیمی نظام بھی بہتر ہے لیکن اسے مزید معیاری بنانے کی ضرورت ہے۔ تیسرا اہم قدم جو مجھے لگتا ہے کہ اٹھانا بہت ضروری ہے وہ صحت کا شعبہ ہے۔ ہندوستان صحت کے معاملے میں کافی پیچھے ہے اور اس کو عالمی سطح پر لانا ایک چیلنج ہے۔‘‘ ان خیالات کا اظہار کانگریس صدر راہل گاندھی نے بحرین میں ’گلوبل آرگنائزیشن آف پیپل آف انڈین آریجن‘ (جی او پی آئی او) کی ایک تقریب میں شامل ہند نژاد بزنس مین کے ایک سوال کا جواب دیتے ہوئے کیا۔ اس تقریب میں سب سے پہلے راہل گاندھی نے اپنی تقریر کے دوران وہاں موجود لوگوں کا بہترین استقبال کے لیے شکریہ ادا کیا اور اس موقع کو اپنے لیے اعزاز قرار دیا۔

اپنی تقریر میں کانگریس صدر نے ہندوستان کی سیاست اور ہندوستان کے حالات پر اپنی رائے پیش کی اور اس کو کس طرح بہتر بنایا جا سکتا ہے اس پر اظہار خیال کیا۔ انھوں نے کہا کہ کانگریس کا ویژن ایک اسٹیٹ یا ایک کاسٹ پر مبنی نہیں ہے بلکہ پورے ملک پر مبنی ہے۔ انھوں نے کہا کہ ’’ہمارا مشن یہ ہے کہ سبھی طبقات اور سبھی مذاہب کو ساتھ لے کر چلا جائے اور ملک میں سبھی کو ترقی کا یکساں موقع فراہم کیا جائے۔‘‘

اس گلوبل کنونشن کے آخر میں وہاں موجود لوگوں کو راہل گاندھی سے سوال پوچھنے اور ان سے مخاطب ہونے کا موقع بھی فراہم کیا گیا۔ اس موقع پر ایک خاتون نے سوال پوچھا کہ سوشل میڈیا پر جس طرح آپ کے خلاف جھوٹی باتیں پھیلائی جاتی ہیں اس سے کس طرح بچا جا سکتا ہے؟ اس کے جواب میں راہل گاندھی نے کہا کہ ’’سوشل میڈیا کے پیچھے پیسہ ہے اس لیے جھوٹ ضرور پھیلے گا، لیکن سچ میں وہ طاقت ہے کہ خود نظر آ جاتا ہے۔ سچ تو ایک چمکدار ہیرا کی مانند ہوتا ہے اور آپ چاہیں تو اسے بہ آسانی محسوس کر سکتی ہیں۔‘‘ انھوں نے اپنے اس مختصر جواب سے یہ بتانے کی کوشش کی کہ سچ کا جادو ہمیشہ سر چڑھ کر بولتا ہے اور جھوٹ بہت زیادہ دیر تک اسے دبا نہیں سکتا۔

کرناٹک سے تعلق رکھنے والے عتیق نامی ایک شخص نے راہل گاندھی سے کرناٹک انتخابات کے متعلق سوال پوچھ لیا اور کانگریس کے امکانات پر روشنی ڈالنے کے لیے کہا۔ راہل گاندھی نے اس سوال کے جواب میں پرجوش انداز میں کہا کہ ’’ہماری تیاری اچھی ہے۔ ہمارے وزیر اعلیٰ کرناٹک میں اچھا کام کر رہے ہیں اور وہاں ہم انتخاب میں فتح حاصل کریں گے۔‘‘

اس سے قبل بحرین میں مقیم ہندوستانیوں سے بہتر تعلقات استوار کرنے کے مقصد سے اپنے پہلے دورۂ بحرین پر پہنچے کانگریس صدر نے کراؤن پرنس سلمان بن حماد الخلیفہ سے ملاقات کی اور اس دوران بحرین و ہندوستان کے مفاد سے متعلق کئی ایشوز پر گفتگو ہوئی۔ انھوں نے اس ملاقات کو اپنے ٹوئٹ کے ذریعہ شاندار اور مثبت قرار دیا۔ راہل گاندھی نے کراؤن پرنس کو سابق وزیر اعظم پنڈت جواہر لال نہرو کی کتاب ’ڈسکوری آف انڈیا‘ تحفۃً پیش کیا۔ بعد ازاں ظہرانہ پر ان کی ملاقات بحرین کے وزیر خارجہ پرنس شیخ خالد بن احمد الخلیفہ سے ہوئی۔ شیخ خالد کی مہمان نوازی سے راہل لطف اندوز ہوئے اور ان کا شکریہ ادا کیا۔

بحرین کے وقت کے مطابق شام چار بجے راہل گاندھی نے ہند نژاد بزنس لیڈروں کے ساتھ انتہائی اہم میٹنگ کی جس سیم پترودا، مدھو یشکی اور ششی تھرور وغیرہ موجود تھے۔ اس میٹنگ میں راہل گاندھی نے بزنس لیڈر کے ساتھ کئی اہم موضوعات پر گفتگو کی اور بحرین میں ان کے بزنس میں درپیش معاملات کو سمجھنے کی کوشش کی۔