مولانا واضح رشید حسنی ندویؒ کی وفات پر ابوظبی میں تعزیتی نششت کا انعقاد

متحدہ عرب امارات میں مقیم ابناء الندوہ نے حضرت مولانا واضح رشید حسنی ندوی علیہ الرحمہ کی وفات پرملال پر 19 جنوری 2019 بروز سنیچر بوقت رات 9 بجے شب ابوظبی میں مولانا فیضان ندوی کے رہائش گاہ پر ایک تعزیتی نششت کا انعقاد کیا۔ جلسہ کا آغاز مولانا عقیل ندوی کی تلاوت کلام پاک سے ہوا۔ نشست کے کنوینر اخلاق الرحمن ندوی نے حاضرین کا استقبال کیا۔مجلس میں ابوظبی کے علاوہ العین اور دبئی میں مقیم متعدد ندوی فارغین و فضلاء شریک ہوئے جن میں العین سے مولانا نعمان ندوی اور دبئی سے مولانا اسامہ ندوی خاص طور پر قابل ذکر ہیں۔

اس موقع سے مولانا نعمت اللہ ادریس ندوی اور سید جمال ندوی نے مولانا مرحوم کے علمی، ادبی، فکری او ر صحافتی کارناموں کے مختلف پہلووں پر مفصل روشنی ڈالی۔ شرکاء نے مولانا کی وفات کو عالم اسلام اور امت مسلمہ کے لئے ایک عظیم خسارہ قرار دیا۔ آخر میں مولانا فیضان ندوی صاحب نے شرکاء کا شکریہ ادا کیا اور دعاء مغفرت پر نشست کا اختتام ہوا۔

قابل ذکر ہے کہ مولانا واضح رشید حسنی ندوی علیہ الرحمہ کی وفات گزشتہ 16 جنوری کی صبح ندوہ میں ہوئی تھی اور نماز جنازہ بھی ندوہ میں ہی ادا کی گئی۔ ان کے انتقال کی خبر لوگوں کے لیے غمناک خبر رہی اور یہی وجہ ہے کہ انتقال کے بعد جو تعزیتی اجلاس کا سلسلہ شروع ہوا تو وہ اب بھی جاری ہے۔ واضح رہے کہ مولانا رابع حسنی ندوی ان کے حقیقی بھائی ہیں۔