اسرائیل کی غزہ پر بمباری جاری، صہیونی بستیوں پر حماس کی راکٹ باری

سات اکتوبر کو شروع ہونے والی جنگ کے 13 ویں روز بھی اسرائیل نے غزہ پر بمباری جاری رکھی۔ خوفناک بمباری میں پناہ گزین کیمپ،ا سکول اور مسجد کو بھی نشانہ بنایا گیا۔ بڑی تعداد میں فلسطینیوں کی اموات ہوئیں۔ یاد رہے جنگ میں 3800 کے قریب فلسطینی جاں بحق ہوچکے ہیں۔

العربیہ اور الحدث کے نامہ نگار نے بتایا کہ حماس نے جمعرات کے روز عسقلان، اسدود اور غزہ کے اطراف دیگر اسرائیلی بستیوں پر راکٹوں سے حملے کئے۔ دو راکٹ سدیروت میں جا کر گرے۔ حماس کے عسکری ونگ القسام بریگیڈز نے غزہ کی پٹی میں رعیم فوجی اڈے اور صوفا کے مقام پر راکٹوں اور مارٹروں سے بمباری کی۔

قبل ازیں فلسطینی ٹیلی ویژن نے اطلاع دی تھی کہ غزہ کی پٹی کے علاقے خان یونس میں بے گھر افراد کے ایک اسکول کے قریب اسرائیلی بمباری میں متعدد افراد جاں بحق اور زخمی ہوگئے۔ غزہ پر اسرائیل کی پرتشدد بمباری میں جاں بحق  ہونے والوں کی تعداد 3800 کے لگ بھگ ہوگئی ہے۔

فلسطینی میڈیا کے مطابق خان یونس پر اسرائیلی بمباری میں کم از کم 5 افراد کے جاں بحق اور درجنوں زخمی ہوئے۔ اس بمباری میں بڑی تعداد میں بچے جاں بحق  ہوگئے۔ میڈیا نے اس جارحیت کو نیا قتل عام قرار دیا ہے۔ العربیہ اور الحدث کے نامہ نگار نے یہ بھی اطلاع دی ہے کہ اسرائیلی بمباری نے خان یونس کے گنجان آباد الامل محلے کو متعدد میزائلوں سے نشانہ بنایا۔

فلسطینی ریڈیو کے رپورٹ کے مطابق فلسطینی وزارت صحت کا کہنا ہے کہ تمام ہسپتالوں میں ادویات کا کوئی ذخیرہ موجود نہیں ہے۔ جمعرات کو وائس آف فلسطین ریڈیو نے وزارت صحت کے حوالے سے بتایا کہ اسے جلد ہی ادویات کے مستقل طور پر ختم ہونے کا خدشہ ہے۔(بشکریہ العربیہ ڈاٹ نیٹ)