حزب اللہ اور اسرائیل کے درمیان جنگ بڑھنے کے خطرات، ہندوستانی سفارتخانے کی اپنے شہریوں سے اپیل

لبنان کی حزب اللہ اور اسرائیل کے درمیان بڑھتی ہوئی جنگ اور کئی ممالک کی جانب سے لبنان کے سفر کے خلاف ایڈوائزری جاری کرنے کے پیش نظر ہندوستانی سفارت خانے نے وہاں ہندوستانی شہریوں کو احتیاط برتنے اور بیروت میں سفارتخانے سے رابطہ میں رہنے کے لیے کہا ہے۔

ایڈوائزری میں کہا گیا ہے کہ لبنان کی موجودہ صورتحال کے پیش نظر وہاں مقیم تمام ہندوستانی شہریوں کو احتیاط برتنے اور بیروت میں ہندوستانی سفارتخانے سے رابطے میں رہنے کا مشورہ دیا گیا ہے۔ اس سے قبل جرمنی، ہالینڈ، آئرلینڈ، اردن اور کناڈا نے لبنان کے سفر کے خلاف ایڈوائزری جاری کی ہے۔

وزارت خارجہ کے ایک ترجمان نے کہا ’’ہندوستانی سفارت خانے نے سفری ایڈوائزری جاری نہیں کی ہے۔ انہوں نے کہا کہ وہاں تقریباً 2000-3000 ہندوستانی پیشہ ور رہتے اور کام کرتے ہیں۔ یہ ٹریول ایڈوائزری نہیں ہے، یہ صرف انہیں سفارتخانے سے رابطے میں رکھنے کے لیے ہے۔ یہ ایک ابھرتی ہوئی صورت حال ہے اور مکمل احتیاط برتنے کے لئے جاری کی گئی ہے۔‘‘

اسرائیل نے کہا ہے کہ وہ لبنان میں جنگ نہیں چاہتا لیکن یہ اس کے پڑوسی کو پتھر کے زمانے میں واپس بھیج سکتا ہے۔اسرائیلی وزیر دفاع یوو گیلنٹ نے بدھ کے روز کہا ’’ہم جنگ نہیں چاہتے لیکن ہم ہر صورت حال کے لیے تیاری کر رہے ہیں۔ حزب اللہ اچھی طرح سمجھتا ہے کہ اگر جنگ شروع ہوئی تو ہم لبنان میں بڑے پیمانے پر نقصان پہنچا سکتے ہیں۔