متحدہ عرب امارات کے شہر ابو ظہبی میں خلیج کے پہلے اسرائیلی سفارت خانہ کا افتتاح

ابو ظہبی: متحدہ عرب امارات کے اسرائیل کے ساتھ تعلقات لگاتار مضبوط ہو رہے ہیں دونوں ممالک کے مابین کئی طرح کے سفارتی اور کاروباری معاہدے طے پا رہے ہیں۔ اسی ضمن میں منگل کے روز کے روز اسرائیل نے خلیج کے اپنے پہلے سفارت خانہ کا ابوظہبی میں افتتاح کیا۔ اس موقع پر متحدہ عرب امارات اور اسرائیل کے درمیان کئی معاشی اور تجارتی معاہدوں پر بھی دستخط کئے گئے۔

ابوظہبی میں موجود اسرائیل کے وزیر خارجہ نے اس موقع پر کہا کہ ’’یہ تاریخی لمحہ ہے، مشرق وسطیٰ ہمارا گھر ہے، ہم خطے کے تمام ممالک سے مطالبہ کرتے ہیں کہ آئیں اور ہم سے بات کریں۔‘‘ انہوں نے کہا کہ ’’ہم یہیں رہنا ہے۔ ہم خطے کے تمام ممالک پر زور دیتے ہیں کہ وہ اس (حقیقت) کو تسلیم کریں۔‘‘

اسی ماہ تل ابیب میں متحدہ عرب امارات کے سفارت خانے نے اپنا کام شروع کردیا تھا اور اسرائیل میں یو اے ای کے پہلے سفیرمحمد الخاجہ نے تل ابیب میں اپنی سفارتی ذمے داریاں سنبھال لی تھیں۔اس سے پہلے اسرائیل نے یو اے ای میں اپنا سفارت خانہ کھولنے کا اعلان کیا تھا اور تجربہ سفارت کار ایتان نوح کو اپنے مشن کا سربراہ مقرر کیا تھا۔

واضح رہے کہ متحدہ عرب امارات اور اسرائیل کے درمیان گزشتہ سال تعلقات بحال ہوئے تھے اور اس کے بعد کئی مسلم ممالک نے اسرائیل سے تعلقات کی بحالی کے لئے بات چیت شروع کر دی اور یہ سلسلہ اب بھی جاری ہے۔

یو اے ای نے 13 اگست 2020ء کو اسرائیل کے ساتھ معمول کے سفارتی تعلقات استوار کرنے کے تاریخی امن معاہدے کا اعلان کیا تھا اور 15 ستمبر کو وائٹ ہاؤس میں سابق امریکی صدر ڈونلڈ ٹرمپ کی ثالثی میں طے شدہ معاہدۂ ابراہیم پر سابق اسرائیلی وزیراعظم بنیامین نیتن یاہو اور اماراتی وزیرخارجہ شیخ عبداللہ بن زاید نے دست خط کیے تھے۔یو اے ای نے مصر اور اردن کے اسرائیل سے امن معاہدوں کے کوئی ربع صدی کے بعد معمول کے تعلقات استوار کیے تھے۔اس کے بعد بحرین ، مراکش اور سوڈان نے بھی اسرائیل سے معمول کے تعلقات استوار کر لیے ہیں۔