خلیجی ممالک پیغمبر اسلامؐ کے خلاف بی جے پی لیڈروں کے تبصروں پر برہم

بی جے پی کی سابق ترجمان اور نوین جندل کے پیغمبر اسلامؐ کے خلاف تبصروں پر خلیجی مملک نے سخت رد عمل کا اظہار کیا ہے اور یہ ایک ایسے وقت میں آیا ہے جب نائب صدر وینکیا نائیڈو نے اعلیٰ سطحی وفد کے ساتھ قطر کا چار روزہ دورہ شروع کیا ہے۔

ایران، قطر، کویت نے ہندوستانی سفیروں کو طلب کرلیا

پیغمبر اسلام کے خلاف کیے گئے تبصروں سے ناراض، قطر کی وزارت خارجہ نے ہندوستانی سفیر دیپک متل کو طلب کیا اور انہیں جندل کے تبصرے پر مایوسی کا اظہار کرتے ہوئے ایک سرکاری نوٹ سونپا۔وزارت نے کہا کہ "ہم ہندوستان میں حکمراں جماعت کے ایک عہدیدار کی طرف سے پیغمبر اسلامؐ کے خلاف کیے گئے متنازعہ تبصروں کی مذمت کرتے ہیں،" وزارت نے مزید کہا کہ قطر نے بی جے پی کے جاری کردہ بیان کا خیرمقدم کیا، جس میں اس نے عہدیدار کو پارٹی سے ہٹانے کا اعلان کیا تھا۔

ادھر کویت کی وزارت خارجہ نے ہندوستانی سفیر سبی جارج کو طلب کیا اور اسسٹنٹ سکریٹری آف اسٹیٹ برائے ایشیا امور کی طرف سے ایک سرکاری احتجاجی نوٹ حوالے کیا، جس میں کویت نے پیغمبر اسلامؐ کے خلاف بی جے پی رہنماؤں کے تبصروں کی مذمت کی اور ان کو مسترد کیا۔

اس کے چند گھنٹے بعد ایران نے بھی ہندوستانی سفیر کو طلب کرکے پیغمبر اسلامؐ کے خلاف کئے گئے تبصروں کی مذمت کی۔ ادھر عمان نے سخت الفاظ میں مذمت کی ہے جبکہ سعودی عرب اور بحرین نے ان تبصروں کی سخت الفاظ میں مذمت کی ہے۔

واضح رہے بی جے پی نے پارٹی ترجمان نوپور شرما کو معطل کر دیا ہے جبکہ اس کے دہلی میڈیا کے سربراہ نوین کمار جندل کو ان کے اشتعال انگیز ریمارکس کے لیے پارٹی سے نکال دیا ہے۔ بی جے پی جنرل سکریٹری ارون سنگھ نے کہا کہ بی جے پی ایسے لوگوں یا ایسے نظریہ کو فروغ نہیں دیتی۔

واضح رہے ان خلیجی ممالک میں بی جے پی کے رہنماؤں کے ان تبصروں کے خلاف ٹوئٹر پر ہندوستانی مصنوعات کے بائیکاٹ کا ہیش ٹیگ ٹریند کر رہا ہے جس کے بعد وہاں کی حکومتوں نے اس معاملہ کا سختی سے نوٹس لیا۔