غزہ میں جنگ کے سائے میں منایا گیا عید الفطر کا تہوار

دنیا کے  ایک بڑے حصے میں  کل یعنی  بدھ کو مسلمانوں نے  عید الفطر کا تہوار منا یا جبکہ خاص عید کے دن بھی  غزہ پر اسرائیلی حملے اس وقت ہوئے جب مقامی مسلمانوں نے رمضان کے اختتام پر اس تباہ شدہ خطے میں کھنڈرات نما ملبے پر عید الفطر کی نماز ادا کی۔

ہزاروں مسلمان مقبوضہ مشرقی یروشلم میں مسجد اقصیٰ کے احاطے میں بھی جمع ہوئے، جہاں ایک نمازی اور مردانہ نرس راون عبد نے کہا، ''یہ اب تک کی سب سے غمناک عید ہے، آپ لوگوں کے چہروں پر اداسی دیکھ سکتے ہیں۔‘‘

غزہ میں اس سال عید الفطر کے تہوار پر جنگ، بھوک، موت اور تباہی کے سائے چھائے ہوئے ہیں۔ اسرائیل نے غزہ کی جنگ کے ابتدائی دنوں میں اس خطے کے لیے امداد کی ترسیل روک دی تھی لیکن پھر امریکی دباؤ کے تحت آہستہ آہستہ امدادی سامان والے ٹرکوں کو داخلے کی اجازت دی گئی۔ پھر بھی امدادی گروپوں نے شکایت کی ہے کہ غزہ تک رسد پہنچنے میں بہت تاخیر ہو رہی ہے جس کی وجہ اسرائیل کی طرف سے لگائی گئی پابندیاں ہیں۔ دریں اثنا کئی ممالک دیگر راستوں سے غزہ کے بحران زدہ عوام تک رسد پہنچانے کی کوشش کر رہے ہیں۔ ان میں فضائی اور سمندری دونوں طرح کے ذرائع کا استعمال کیا جا رہا ہے۔

اسرائیل کا کہنا ہے کہ اس نے جنگ کے اپنے ابتدائی ہدف ''شمالی غزہ‘‘ جیسے سخت متاثرہ علاقے کی امداد میں مسلسل اضافہ کیا ہے اور ٹرکوں کے داخل ہونے اور پہنچنے کے لیے مزید داخلی مقامات کھولنا شروع کر دیے ہیں۔

اسرائیل امدادی گروپوں پر الزام عائد کرتا ہے کہ وہ امداد کی فراہمی میں بہت سست روی کا مظاہرہ کر رہے ہیں۔ غزہ پٹی میں ان گروپوں کا کہنا ہے کہ لاجسٹک مسائل اور غیر یقینی صورتحال ان کے کاموں میں بڑی رکاوٹ بنے ہوئے ہیں۔ (بشکریہ ڈی ڈبلو اردو)